બનાસકાંઠા જિલ્લાના અમીરગઢ ચેકપોસ્ટ  નજીકથી એક ભારે હૃદયદ્રાવક અકસ્માતના સમાચાર સામે આવ્યા છે. અહી એક પૂરપાટ ઝડપે આવી રહેલા ટેન્કર અને બાઈક વચ્ચે જોરદાર ટક્કર થતાં ગમખ્વાર અકસ્માત સર્જાયો હતો. આ કરુણ દુર્ઘટનામાં બાઈક સવાર યુવકનું ગંભીર ઈજાઓ થવાના કારણે ઘટનાસ્થળે જ કમકમાટીભર્યું મોત નીપજ્યું હતું.

પ્રાપ્ત વિગતો અનુસાર, અમીરગઢ ચેકપોસ્ટ પાસે હાઈવે પરથી પસાર થઈ રહેલી એક મોટરસાયકલને ટેન્કરે જોરદાર ટક્કર મારી હતી. અકસ્માત એટલો ભયાનક હતો કે બાઈક ચાલક યુવક ટેન્કરના વ્હીલ નીચે આવી ગયો હતો, જેના કારણે તેને શરીરે અને માથાના ભાગે જીવલેણ ઈજાઓ પહોંચી હતી. અકસ્માતને પગલે આસપાસના સ્થાનિક લોકો અને રાહદારીઓ તાત્કાલિક બચાવ કામગીરી માટે દોડી આવ્યા હતા, પરંતુ ગંભીર ઈજાઓના કારણે યુવકે ઘટનાસ્થળે જ દમ તોડી દીધો હતો.

આ અકસ્માતની જાણ સ્થાનિક પોલીસને કરવામાં આવતા પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે કાયદેસરની કાર્યવાહી હાથ ધરીને મૃતક યુવકના ખિસ્સામાંથી મળી આવેલા દસ્તાવેજોના આધારે તપાસ શરૂ કરી હતી. પ્રાથમિક તપાસમાં સામે આવ્યું છે કે મૃતક યુવક પડોશી રાજ્ય રાજસ્થાનનો રહેવાસી હતો.

અમીરગઢ પોલીસે યુવકના મૃતદેહને કબજે કરી, અકસ્માત મોતનો ગુનો નોંધીને તેને પોસ્ટમોર્ટમ અર્થે નજીકના સામૂહિક આરોગ્ય કેન્દ્ર ખાતે ખસેડ્યો છે. પોલીસે રાજસ્થાનમાં રહેતા યુવકના પરિવારજનોને ઘટના અંગેની જાણ કરી દીધી છે. પોલીસે અકસ્માત સર્જનાર ટેન્કર ચાલક વિરુદ્ધ ગુનો નોંધી આગળની કાયદેસરની તપાસ હાથ ધરી છે.