અમદાવાદ મ્યુનિસિપલ કોર્પોરેશન (AMC) ના હેલ્થ અને ફૂડ વિભાગ દ્વારા મે મહિનામાં શહેરીજનોના આરોગ્ય સાથે ચેડાં કરતા તત્વો સામે એક સઘન ફૂડ સેફ્ટી ડ્રાઈવ ચલાવવામાં આવી રહી છે. આ ઝુંબેશ અંતર્ગત માત્ર 18 દિવસના ટૂંકા ગાળામાં જ શહેરના વિવિધ વિસ્તારોમાં આવેલા 865 ફૂડ યુનિટ્સ (ખાણી-પીણીના એકમો) પર ત્રાટકીને વ્યાપક ચેકિંગ હાથ ધરવામાં આવ્યું હતું. નિયમોનું ઉલ્લંઘન કરનારા અને અસ્વચ્છતા રાખનારા ૫૨૨ એકમોને તંત્ર દ્વારા કડક નોટિસ ફટકારીને કાયદેસરની કાર્યવાહી કરવામાં આવી છે.