ગાંધીનગર : ગુજરાતનું પાટનગર ગાંધીનગર અત્યાર સુધી તેની હરિયાળી અને શાંતિ માટે જાણીતું હતું, પરંતુ હવે તે ટેકનોલોજીના મામલે વિશ્વના સ્માર્ટ સિટીઝને ટક્કર આપવા તૈયાર છે. ગાંધીનગર મહાનગરપાલિકા એક ક્રાંતિકારી પ્રોજેક્ટ લોન્ચ કરવા જઈ રહી છે, જેના દ્વારા શહેરને ‘કમ્પ્લેઇન ફ્રી સિટી’ બનાવવામાં આવશે. હવે નાગરિકોએ રસ્તા પરના ખાડા કે ગટરના લીકેજ માટે કોર્પોરેશનમાં ફોન કે એપ પર ફરિયાદ નહીં કરવી પડે, કારણ કે આર્ટિફિશિયલ ઇન્ટેલિજન્સ (AI) સજ્જ વાહન સમસ્યા ઉદભવતાની સાથે જ તેને શોધી કાઢશે.
હવામાં વાત નહીં, હાઈટેક સર્વેલન્સ
આ પ્રોજેક્ટ હેઠળ તૈનાત કરવામાં આવનાર ખાસ વાહનની છત પર હાઈ-રિઝોલ્યુશન 360 ડિગ્રી કેમેરા અને અત્યાધુનિક સેન્સર્સ લગાવવામાં આવશે. આ વાહન જ્યારે શહેરના માર્ગો પર ફરશે ત્યારે તેની AI સિસ્ટમ ‘રીઅલ ટાઈમ મેપિંગ’ કરશે. રસ્તા પરની નાની તિરાડ હોય, ઘસાઈ ગયેલા રોડ માર્કિંગ્સ હોય કે પીવાના પાણીનું લીકેજ - આ મશીન કંઈ પણ છુપાવવા દેશે નહીં. ઓબ્જેક્ટ રેકગ્નિશન ટેકનોલોજીની મદદથી ફૂટપાથ પરના દબાણો અને રસ્તા પર પડેલા કચરાને પણ તુરંત પકડી પાડવામાં આવશે.
સેકન્ડોમાં એક્શન: અધિકારીઓ પર રહેશે વોચ
જેવો આ AI વ્હીકલ કોઈ સમસ્યા ડિટેક્ટ કરશે, કે તુરંત જ તેના GPS લોકેશન અને ફોટો સાથેનો ડેટા સેન્ટ્રલ કમાન્ડ એન્ડ કંટ્રોલ સેન્ટર પર પહોંચી જશે. ત્યાંથી સેકન્ડોની અંદર સંબંધિત એન્જિનિયર અથવા વોર્ડ ઓફિસરના મોબાઈલ પર સીધો ‘વર્ક ઓર્ડર’ જનરેટ થશે. આ સિસ્ટમમાં ટાઈમ સ્ટેમ્પ હોવાથી અધિકારીએ નક્કી કરેલા સમયમાં કામ પૂરું કરી તેનો રિપોર્ટ ઓનલાઈન અપલોડ કરવો પડશે. એટલે કે હવે કામચોરીની કોઈ જગ્યા રહેશે નહીં.
70% સુધી ખર્ચ બચશે અને પ્લાનિંગ થશે સરળ
નિષ્ણાતોનું માનવું છે કે રસ્તા પર નાનો ખાડો પડે કે તરત જ તેને રિપેર કરી દેવામાં આવે તો મોટો ખર્ચ બચે છે. આ ટેકનોલોજીથી મેન્ટેનન્સ પાછળ થતા ખર્ચમાં 70% જેટલો ઘટાડો થશે. ઉપરાંત, શહેરના કયા વિસ્તારમાં વારંવાર સમસ્યાઓ સર્જાય છે તેનો ‘હીટ મેપ’ પણ તૈયાર થશે, જે ભવિષ્યના ટાઉન પ્લાનિંગમાં વહીવટી તંત્રને ખૂબ જ મદદરૂપ સાબિત થશે.
સ્ટેન્ડિંગ ચેરમેન ગૌરાંગ વ્યાસે જણાવ્યું કે, ગાંધીનગરને ડસ્ટ ફ્રી બનાવ્યા બાદ હવે અમારો લક્ષ્યાંક તેને દેશનું પ્રથમ કમ્પ્લેઇન ફ્રી સિટી બનાવવાનો છે. જો પાટનગરમાં આ પ્રયોગ સફળ રહેશે, તો આગામી સમયમાં અમદાવાદ, સુરત અને વડોદરા જેવા મહાનગરોમાં પણ આ ‘સ્માર્ટ આંખ’ રસ્તાઓ પર દેખાશે.