રાજકોટ, તા.૨૩: ગુજરાતમાં વસતી  ગણત્રી પ્રક્રિયાનો પ્રારંભ થયો છટ, તેવા સમયે ઓન લાઈન ફોર્મ ભરવાનો પ્રક્રિયાની જાણકારી સાથે લોકોમાં આ પ્રક્રિયા વધુ લોકભોગ્‍ય બને તે માટે મુખ્‍ય મંત્રી, નાયબ મુખ્‍ય મંત્રી સહિતના મહાનુભાવો દ્વારા ઓન લાઈન પ્રક્રિયા ચાલુ છે. હવે આ પ્રક્રિયા અનુસંધાને રાજ્‍યના મુખ્‍ય પોલીસ વડા ડો.કે એલ એન.રાવ દ્વારા ફોર્મ ભરવામાં આવ્‍યું છે.

પોતાની નોંધણી પૂર્ણ કર્યા બાદ રાજ્‍ય પોલીસ વડાએ સમગ્ર પોલીસ બેડા અને નાગરિકોને આ રાષ્‍ટ્રીય કાર્યમાં સહભાગી થવા માટે આહવાન કર્યું છે. તેમણે ખાસ અનુરોધ કરતા જણાવ્‍યું છે કે, રાજ્‍યના તમામ પોલીસ પરિવારો સમયસર ઓનલાઇન પોર્ટલનો ઉપયોગ કરીને આ સ્‍વ ગણતરી અભિયાનમાં જોડાય. ડિજિટલ માધ્‍યમથી નોંધણી કરવાથી સમયની બચત થાય છે અને સચોટ માહિતી વહીવટી તંત્ર સુધી પહોંચે છે, જેથી સરકારી યોજનાઓનું આયોજન બહેતર થઈ શકે. વસતી ગણતરી-૨૦૨૭ને દેશનો સૌથી મોટો ડિજિટલ ડેટાબેઝ બનાવવાની દિશામાં કામ થઈ રહ્યું છે, ત્‍યારે પોલીસ વડાની આ પહેલ બાદ હવે આગામી દિવસોમાં સરકારી કર્મચારીઓ અને સામાન્‍ય જનતામાં પણ ઓનલાઇન સ્‍વ નોંધણી મેળવવાનો ક્રેઝ વધશે તે નક્કી છે.