અંકલેશ્વર : ગુજરાતભરમાં દારૂબંધીના કડક અમલ વચ્ચે બુટલેગરો દ્વારા પોલીસને થાપ આપવા માટે રોજ નવી નવી કિમુઆતો અપનાવવામાં આવતી હોય છે. તાજેતરમાં અંકલેશ્વર નજીક નેશનલ હાઇવે નંબર ૪૮ પર સ્ટેટ મોનિટરિંગ સેલ (SMC) ની ટીમે બાતમીના આધારે એક મોટી કાર્યવાહી કરી છે. એરકંડિશનર (AC) ના મોટા ખોખાં અને બોક્સની આડમાં કન્ટેનરમાં સુરત તરફ લઈ જવામાં આવતો લાખો રૂપિયાનો વિદેશી દારૂનો મસમોટો જથ્થો પોલીસે સફળતાપૂર્વક ઝડપી પાડ્યો છે.

પ્રાપ્ત વિગતો અનુસાર, એસ.એમ.સી. ની ટીમને ચોક્કસ બાતમી મળી હતી કે એક કન્ટેનર ટ્રકમાં વિદેશી દારૂનો મોટો જથ્થો છુપાવીને નેશનલ હાઇવે 48 ઉપરથી સુરત તરફ લઈ જવામાં આવી રહ્યો છે. આ બાતમીના આધારે એસએમસીની ટીમે અંકલેશ્વરના અંસાર માર્કેટ નજીક હાઇવે પર વોચ ગોઠવી હતી. દરમિયાન, શંકાસ્પદ જણાતું કન્ટેનર આવતાં પોલીસે તેને રોકવાનો પ્રયાસ કર્યો હતો, પરંતુ કન્ટેનર ચાલક પોલીસને જોઈને વાહન રોડ પર જ ઊભું રાખીને અંધારાનો લાભ લઈને નાસી છૂટવામાં સફળ રહ્યો હતો.

પોલીસે કન્ટેનરનો દરવાજો ખોલીને તલાશી લીધી ત્યારે બુટલેગરોની ચાલાકી જોઈને અધિકારીઓ પણ આશ્ચર્યચકિત થઈ ગયા હતા. તપાસકર્તાઓને છેતરવા માટે કન્ટેનરના આગળ અને પાછળના ભાગમાં બિલકુલ નવા નક્કોર એ.સી. (AC) ના મોટા બોક્સ વ્યવસ્થિત રીતે ગોઠવવામાં આવ્યા હતા, જેથી પ્રથમ નજરે જોનારને એમ જ લાગે કે ટ્રકમાં માત્ર ઇલેક્ટ્રોનિક સામાન જ ભરેલો છે. પરંતુ આ એસીના બોક્સની બરાબર પાછળના ભાગમાં વિદેશી દારૂની પેટીઓનો મોટો ખડકલો કરવામાં આવ્યો હતો.

આ દરોડા દરમિયાન પોલીસે કન્ટેનરમાંથી ૧૧,૧૧૧ નંગ વિદેશી દારૂની બોટલો (કિંમત રૂ. ૪૫,૪૯,૧૧૭), ૧૧૧ નંગ એરકંડિશનર (કિંમત રૂ. ૫૫,૫૦,૦૦૦) તેમજ કન્ટેનર ટ્રક (કિંમત રૂ. ૨૫,૦૦,૦૦૦) સહિત કુલ રૂ. ૧.૨૫ કરોડથી વધુનો મુદ્દામાલ જપ્ત કર્યો છે. અંકલેશ્વર બી ડિવિઝન પોલીસ મથકે આ અંગે ગુનો નોંધીને ફરાર થઈ ગયેલા કન્ટેનર ચાલક તેમજ આ દારૂનો જથ્થો મોકલનાર અને મંગાવનાર મુખ્ય સૂત્રધારોને ઝડપી પાડવા માટે પોલીસ દ્વારા સઘન તપાસ શરૂ કરવામાં આવી છે.