વડોદરા :માંજલપુર વિધાનસભા બેઠકની આગામી પેટાચૂંટણીને લઈને રાજકીય ગરમાવો ચરમસીમાએ પહોંચી ગયો છે. આ પ્રતિષ્ઠિત બેઠક માટે ભાજપ અને કોંગ્રેસ બંને પક્ષના દિગ્ગજ ઉમેદવારો પોતાના સમર્થકો અને મોવડીમંડળની હાજરીમાં વિધિવત રીતે ઉમેદવારી પત્ર ભરવા જઈ રહ્યા છે. આ સાથે જ માંજલપુરનો રાજકીય જંગ હવે સત્તાવાર રીતે ખરાખરીના તબક્કામાં પ્રવેશશે.

ભાજપના ઉમેદવાર સતિષ પટેલ આજે સવારે 11:00 વાગ્યે એક વિશાળ 'વિજય વિશ્વાસ રેલી' યોજીને પોતાનું નામાંકન પત્ર દાખલ કરશે. આ શક્તિપ્રદર્શનમાં ભાજપના કાર્યકરો અને સ્થાનિક નેતાઓ મોટી સંખ્યામાં જોડાશે. ખાસ કરીને, પ્રદેશ ભાજપ પ્રમુખ જગદીશ વિશ્વકર્મા આ પ્રસંગે વિશેષ રૂપે ઉપસ્થિત રહીને ઉમેદવારનો ઉત્સાહ વધારશે. ભાજપે આ બેઠક પર પોતાનો ગઢ જાળવી રાખવા માટે ખાસ્સું જોર લગાવ્યું છે અને રેલીના માધ્યમથી મતદારોમાં એક મજબૂત સંદેશ આપવાનો પ્રયાસ કરવામાં આવશે.

બીજી તરફ, કોંગ્રેસના ઉમેદવાર ભીખા રબારી પણ આજે જ પોતાનું ફોર્મ ભરીને ભાજપને કાંટાની ટક્કર આપવા માટે મેદાનમાં ઉતરશે. કોંગ્રેસ પક્ષ આ પેટાચૂંટણીને અત્યંત ગંભીરતાથી લઈ રહ્યો છે. જેની સાબિતી તેમના ફોર્મ ભરવાના કાર્યક્રમમાં જોવા મળશે. ભીખા રબારીના સમર્થનમાં પ્રદેશ કોંગ્રેસ પ્રમુખ અમિત ચાવડા અને વિધાનસભા કોંગ્રેસ પક્ષના નેતા તુષાર ચૌધરી ખાસ હાજર રહેશે. આ વરિષ્ઠ નેતાઓની હાજરી દર્શાવે છે કે, કોંગ્રેસ આ બેઠક જીતવા માટે કોઈ કસર છોડવા માંગતી નથી.

માંજલપુર પેટાચૂંટણીમાં સતિષ પટેલ અને ભીખા રબારી વચ્ચે સીધો અને રસપ્રદ મુકાબલો જોવા મળશે. એક તરફ ભાજપ પોતાનો પરંપરાગત ગઢ બચાવવા મેદાને છે, તો બીજી તરફ કોંગ્રેસ પરિવર્તનના નારા સાથે મતદારોને રીઝવવાનો પ્રયાસ કરી રહી છે.

આજના હાઈપ્રોફાઈલ નામાંકન પત્રો ભરાયા બાદ બંને પક્ષો દ્વારા પ્રચાર અભિયાન વધુ તેજ કરવામાં આવશે. જેના કારણે આગામી દિવસોમાં માંજલપુરનો રાજકીય માહોલ વધુ ગરમાય તેવી પૂરી સંભાવના છે.