અમદાવાદ | તા.18: અમદાવાદના સરખેજ વિસ્તારમાં એક એવી ઘટના બની છે જે સાંભળીને કોઈ પણના રુંવાડા ઉભા થઈ જાય. મામૂલી વ્યવહાર અને જૂની ઉઘરાણીના મામલે થયેલી તકરારમાં એક મહિલાએ હિંસક રૂપ ધારણ કરીને કરિયાણાની દુકાન ચલાવતી યુવતીના કાન પર એટલી જોરથી બચકું ભર્યું કે કાનનો ભાગ લોહીલુહાણ થઈ ગયો. આ ચોંકાવનારી ઘટના બાદ વિસ્તારમાં ભારે ચકચાર મચી ગઈ છે.
ઉધાર માંગવા આવ્યા અને મામલો બિચક્યો
પ્રાપ્ત વિગતો અનુસાર, ફતેહવાડી વિસ્તારની 23 વર્ષીય યુવતી મકરબાના છીપા નગર વિસ્તારમાં પોતાના પિતા સાથે કરિયાણાની દુકાન ચલાવે છે. બુધવારે બપોરે જ્યારે તે દુકાન પર હાજર હતી, ત્યારે પાડોશમાં રહેતું એક દંપતી ખરીદી કરવા આવ્યું હતું. યુવતીએ જ્યારે આ દંપતી પાસે તેમના અગાઉના બાકી નીકળતા લેણાંની માંગણી કરી, ત્યારે મામલો ગરમાયો હતો. દંપતીએ પૈસા આપવાને બદલે વધુ માલ ઉધાર માંગવા માટે જીદ કરી હતી.
ગાળાગાળી બાદ મહિલાએ કાન કરડી ખાધો
જ્યારે દુકાનદાર યુવતી અને તેના પિતાએ ઉધાર આપવાની ના પાડી, ત્યારે દંપતી ઉશ્કેરાઈ ગયું હતું અને ગાળાગાળી શરૂ કરી દીધી હતી. યુવતીએ જ્યારે અપશબ્દો બોલવાની ના પાડી, ત્યારે દંપતી પૈકીની મહિલા અચાનક આવેશમાં આવી ગઈ અને યુવતી પર હુમલો કરી તેના જમણા કાન પર જોરથી બચકું ભરી લીધું હતું. હુમલો એટલો ગંભીર હતો કે કાનમાંથી સતત લોહી વહેવા લાગ્યું હતું.
હોસ્પિટલમાં ટાંકા લેવા પડ્યા
આ હિંસક હુમલાને જોઈને આસપાસના લોકો દોડી આવ્યા હતા અને તાત્કાલિક 108 એમ્બ્યુલન્સ સેવાને જાણ કરવામાં આવી હતી. ઇજાગ્રસ્ત યુવતીને સોલા સિવિલ હોસ્પિટલ ખસેડવામાં આવી હતી, જ્યાં કાન પર ઊંડા ઘા હોવાથી ડોક્ટરોએ ટાંકા લેવા પડ્યા હતા.
આ મામલે યુવતીએ સરખેજ પોલીસ સ્ટેશનમાં દંપતી વિરુદ્ધ ફરિયાદ નોંધાવી છે. પોલીસે ગુનો નોંધીને કાયદેસરની કાર્યવાહી હાથ ધરી છે. અમદાવાદ જેવા શહેરમાં નજીવી બાબતે આ પ્રકારે માનવીય મર્યાદા ઓળંગીને કરાયેલો આ હુમલો હવે ચર્ચાનો વિષય બન્યો છે.