*અમદાવાદ : ગુજરાતના મુખ્યમંત્રી ભૂપેન્દ્રભાઈ પટેલ આજે સુરતના એક દિવસીય પ્રવાસે નીકળ્યા હતા. ખાસ વાત એ છે કે CM પટેલે હવાઈ મુસાફરીને બદલે વંદે ભારત એક્સપ્રેસ ટ્રેન દ્વારા સુરત જવાનું પસંદ કર્યું હતું.

 

મુખ્યમંત્રી કાર્યાલયના સૂત્રો મુજબ, વડાપ્રધાન નરેન્દ્ર મોદીએ તાજેતરમાં તમામ મુખ્યમંત્રીઓ અને મંત્રીઓને અપીલ કરી હતી કે તેઓ સમયાંતરે રેલવે અને જાહેર પરિવહનનો ઉપયોગ કરે જેથી જનસામાન્ય સાથે સીધો સંપર્ક જળવાઈ રહે અને તેમની સમસ્યાઓનો ખ્યાલ આવે. આ અપીલને અનુસરીને CM ભૂપેન્દ્ર પટેલે અમદાવાદથી સુરત સુધીની મુસાફરી વંદે ભારત ટ્રેનમાં કરી હતી.

 

સુરતમાં ભવ્ય સ્વાગત

 

 

મુખ્યમંત્રી વંદે ભારત એક્સપ્રેસમાં સવારે 6:25 કલાકે અમદાવાદથી રવાના થયા હતા અને 9:10 કલાકે સુરત રેલવે સ્ટેશને પહોંચ્યા હતા. સુરત રેલવે સ્ટેશને કેન્દ્રીય મંત્રી, રાજ્યના મંત્રીઓ, સાંસદો, ધારાસભ્યો અને ભાજપના કાર્યકરોએ તેમનું ભવ્ય સ્વાગત કર્યું હતું. ટ્રેનમાં મુસાફરી દરમિયાન CMએ સહ-પ્રવાસીઓ સાથે વાતચીત કરી હતી અને રેલવેની સુવિધાઓ અંગે ફીડબેક લીધો હતો.

 

સુરતમાં વ્યસ્ત કાર્યક્રમ

 

 

CM ભૂપેન્દ્રભાઈ પટેલ સુરતમાં અનેક વિકાસકાર્યોના લોકાર્પણ અને ખાતમુહૂર્ત કરશે. તેમાં ડુમસ સી-ફેસ ડેવલપમેન્ટ, સ્માર્ટ સિટી પ્રોજેક્ટ્સ, આરોગ્ય કેન્દ્રો અને રોડ નેટવર્કના કામોનો સમાવેશ થાય છે. બપોરે તેઓ ઉદ્યોગપતિઓ અને હીરા ઉદ્યોગના અગ્રણીઓ સાથે બેઠક પણ કરશે.

 

મુખ્યમંત્રીએ કહ્યું, "વંદે ભારત જેવી આધુનિક ટ્રેનો ભારતની પ્રગતિનું પ્રતીક છે. રેલવે મુસાફરીથી સામાન્ય માણસની લાગણી અને જરૂરિયાતો સમજવામાં મદદ મળે છે. વડાપ્રધાનશ્રીની ભાવના મુજબ સરકાર જનતા વચ્ચે રહીને જ કામ કરે છે."

 

ઉલ્લેખનીય છે કે આ પહેલા પણ CM ભૂપેન્દ્રભાઈ પટેલ અનેક વખત રાજ્યમાં પ્રવાસ માટે રેલવેનો ઉપયોગ કરી ચૂક્યા છે.