પંચમહાલના ગોધરામાં 16મા નાણાંપંચ હેઠળ વિકાસ કામો માટે અપનાવવામાં આવી રહેલી ટેન્ડર પ્રક્રિયાનો સરપંચ એસોસિએશન દ્વારા વિરોધ કરવામાં આવ્યો છે. સરપંચોના જણાવ્યા મુજબ અગાઉ ગામના વિકાસલક્ષી કામો સરપંચોના માધ્યમથી કરવામાં આવતા હતા, ત્યારે હવે એજન્સી મારફતે કામગીરી કરાવવાની પ્રક્રિયા સામે તેમણે વાંધો વ્યક્ત કર્યો છે.

આ મામલે ગોધરા તાલુકાના સરપંચ એસોસિએશન દ્વારા જિલ્લા વિકાસ અધિકારી, તાલુકા વિકાસ અધિકારી તેમજ જિલ્લા પંચાયતના પ્રમુખને રજૂઆત કરવામાં આવી છે. સરપંચોએ ટેન્ડર પ્રક્રિયા મારફતે વિકાસ કામો કરાવવાની પદ્ધતિમાં ફેરફાર કરવાની માંગ સાથે પોતાની રજૂઆત કરી છે.

સરપંચોએ એજન્સી દ્વારા કરવામાં આવનારી કામગીરીની ગુણવત્તા અંગે પણ આશંકા વ્યક્ત કરી છે. ગામડાઓમાં સ્થાનિક જરૂરિયાતો અને પરિસ્થિતિથી પરિચિત સરપંચોના માધ્યમથી વિકાસ કામો કરવામાં આવતા હોવાનો તેમનો દાવો છે. તેમના મતે, સ્થાનિક સ્તરે થતી કામગીરી અને તેની દેખરેખમાં સરપંચોની ભૂમિકા મહત્વપૂર્ણ રહે છે.

સરપંચ એસોસિએશનના જણાવ્યા પ્રમાણે અગાઉ નાણાંપંચની ગ્રાન્ટ હેઠળ ગામમાં જરૂરી વિકાસ કામો સરપંચોના માધ્યમથી હાથ ધરવામાં આવતા હતા. રોડ, ગટર, પાણી સહિતના સ્થાનિક વિકાસ કામોમાં ગ્રામ પંચાયતની ભૂમિકા રહેતી હતી. હવે ટેન્ડર પ્રક્રિયા અને એજન્સી મારફતે કામગીરી કરાવવાની જોગવાઈને લઈને સરપંચોમાં અસંતોષ જોવા મળી રહ્યો છે.

સરપંચોએ રજૂઆતમાં માંગ કરી છે કે 16મા નાણાંપંચ હેઠળના વિકાસ કામો ટેન્ડર પ્રક્રિયા મારફતે ન કરાવવામાં આવે અને અગાઉની જેમ ગ્રામ પંચાયત તથા સરપંચોના માધ્યમથી કામગીરી કરાવવામાં આવે. આ અંગે જિલ્લા અને તાલુકા સ્તરના અધિકારીઓ સમક્ષ રજૂઆત કરીને સરપંચ એસોસિએશને પોતાની માગણી મૂકી છે. હવે આ રજૂઆત બાદ તંત્ર દ્વારા શું નિર્ણય લેવામાં આવે છે તેના પર નજર રહેશે.