અમદાવા : ગુજરાતમાં હાલમાં એકસાથે ચાર-ચાર હવામાન સિસ્ટમ સક્રિય હોવા છતાં વરસાદી માહોલ જામી રહ્યો નથી, જેને કારણે ખેડૂતો અને નાગરિકોમાં ચિંતા જોવા મળી રહી છે. છેલ્લા ત્રણ દિવસથી રાજ્યના મોટાભાગના વિસ્તારોમાં માત્ર હળવા વરસાદી ઝાપટાં જ નોંધાયા છે. હવામાન વિભાગના જણાવ્યા અનુસાર, આગામી સાત દિવસ એટલે કે ૧૦ સપ્ટેમ્બર સુધી રાજ્યમાં કોઈ ભારે કે મુસળધાર વરસાદની શક્યતા નથી, પરંતુ છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી કરવામાં આવી છે.

હવામાન નિષ્ણાતોના મતે, હાલમાં મધ્યપ્રદેશ અને ઉત્તરપ્રદેશ પર સાયક્લોનિક સર્ક્યુલેશન સાથે સંકળાયેલું લઘુદબાણ (લો પ્રેશર) સક્રિય છે. આ સિવાય મોન્સૂન ટ્રફ, દક્ષિણ ગુજરાતથી ઝારખંડ સુધીની ટ્રફ રેખા અને એક નવું વેસ્ટર્ન ડિસ્ટર્બન્સ પણ સક્રિય બન્યું છે. આમ છતાં, રાજ્યમાં નીચલા સ્તરે દક્ષિણ-પશ્ચિમી પવનો ફૂંકાઈ રહ્યા હોવાના કારણે વરસાદની તીવ્રતા ઓછી જોવા મળી રહી છે.

આજના દિવસે એટલે કે ૪ સપ્ટેમ્બરથી લઈને ૮ સપ્ટેમ્બર દરમિયાન દક્ષિણ ગુજરાતના વલસાડ, નવસારી, ડાંગ, તાપી, સુરત, નર્મદા અને છોટાઉદેપુર જિલ્લાના કેટલાક વિસ્તારોમાં ગાજવીજ સાથે વરસાદ પડી શકે છે. જ્યારે અમદાવાદ, વડોદરા, રાજકોટ, જામનગર, જૂનાગઢ, ભાવનગર અને કચ્છ સહિત ઉત્તર અને મધ્ય ગુજરાતના જિલ્લાઓમાં માત્ર છૂટાછવાયા સ્થળોએ હળવોથી મધ્યમ વરસાદી માહોલ રહેવાની શક્યતા છે. ૯ અને ૧૦ સપ્ટેમ્બર દરમિયાન પણ રાજ્યભરમાં આવો જ હળવો વરસાદી માહોલ જળવાઈ રહેશે.