થરાદ : બનાસકાંઠા જિલ્લાના થરાદ એસટી ડેપોમાં ફરજ બજાવતા એક પ્રામાણિક કંડક્ટરે ઈમાનદારીની અનોખી મિસાલ બેસાડતા મુસાફરનું રોકડ રકમ અને મહત્વના દસ્તાવેજો ભરેલું પાકીટ સાચી સલામતી સાથે તેના સાચા માલિકને પરત કર્યું છે.

પ્રાપ્ત વિગતો અનુસાર, થરાદ-મોરબી રૂટની એસટી બસમાં ફરજ દરમિયાન કંડક્ટર રામજીભાઈ પરમારને બસની સીટ પરથી અજાણ્યા મુસાફરનું એક પોકેટ મળી આવ્યું હતું, જેમાં અંદાજે રૂા. ૧૦,000 ની રોકડ રકમ અને અગત્યના દસ્તાવેજો મોજૂદ હતા.

આ પાકીટની તપાસ કરતાં તે રાજસ્થાનના જાલોર જિલ્લાના વતની અને ટ્રક ડ્રાઈવર ગંગારામનું હોવાનું માલૂમ પડ્યું હતું, અને પોકેટમાં રહેલા ઓળખપત્રોના આધારે કંડક્ટરે તેમના સુધી પહોંચવાના પ્રયાસો હાથ ધર્યા હતા.

આજે તા ૧૧ નવેમ્બરના રોજ કંડક્ટર રામજીભાઈએ પૂરતી જવાબદારી અને પ્રામાણિકતા દાખવીને મૂળ માલિક ગંગારામને બોલાવીને રૂા. ૧૦,000 ની રોકડ રકમ તેમજ તેમના ડ્રાઈવિંગ લાયસન્સ, પાનકાર્ડ સહીતના તમામ મહત્વના દસ્તાવેજો સોંપ્યા હતા.

સરકારી ફરજ બજાવવાની સાથે-સાથે અજાણ્યા વ્યક્તિની મૂડી સુરક્ષિત રીતે પરત કરીને માનવતા અને પ્રામાણિકતાની જીવતી તસવીર રજૂ કરનાર થરાદ ડેપોના કંડક્ટર રામજીભાઈ પરમારની આ કામગીરીથી સમગ્ર પંથકમાં તેમની પ્રશંસા થઈ રહી છે.
 

આ પ્રકારના કિસ્સાઓ વર્તમાન સમયમાં સમાજમાં પ્રામાણિકતા અને માનવતા હજુ પણ જીવંત હોવાની પ્રતીતિ કરાવે છે, જે અન્ય નાગરિકો માટે પણ પ્રેરણારૂપ સાબિત થઈ રહ્યા છે.