રાજકોટ, તા.૧૪: ગુજરાતમાં ઉનાળો હવે તેના પરાકાષ્ઠાએ પહોંચ્યો હોય તેમ લાગી રહ્યું છે. રાજ્યના મોટાભાગના શહેરોમાં અંગ દઝાડતી ગરમી અને લૂના કારણે લોકો ત્રાહિમામ પોકારી ઉઠ્યા છે. હવામાન વિભાગે આજે સૌરાષ્ટ્ર અને કચ્છના કેટલાક વિસ્તારો માટે ગંભીર ચેતવણી જાહેર કરી છે. ખાસ કરીને રાજકોટ, સુરેન્દ્રનગર અને કચ્છમાં તીવ્ર હીટવેવની આગાહીને પગલે 'ઓરેન્જ એલર્ટ' આપવામાં આવ્યું છે, જેનો અર્થ છે કે અહીં ગરમીનું પ્રમાણ જોખમી સ્તરે પહોંચી શકે છે.
 
કયા જિલ્લાઓમાં ગરમીનો કહેર વધુ રહેશે?
હવામાન વિભાગના રિપોર્ટ અનુસાર, માત્ર ઓરેન્જ એલર્ટ વાળા જિલ્લાઓ જ નહીં, પણ રાજ્યના અન્ય ૧૦ જિલ્લાઓમાં પણ સૂર્યનારાયણ આકરા પાણીએ જોવા મળશે. અમદાવાદ, ગાંધીનગર, વડોદરા, પાટણ, બનાસકાંઠા, બોટાદ, અમરેલી, ગીર સોમનાથ, પોરબંદર અને દેવભૂમિ દ્વારકામાં 'યલો એલર્ટ' જાહેર કરવામાં આવ્યું છે. ગઇકાલે અમદાવાદ ૪૪.૧ ડિગ્રી સેલ્સિયસ સાથે રાજ્યનું સૌથી ગરમ શહેર નોંધાયું હતું. આગામી ૨૪ કલાક સુધી પારો ૪૧ થી ૪૫ ડિગ્રીની આસપાસ રહેવાની પુરી શક્યતા છે.
 
રાહતના સમાચાર: ક્યારથી ઘટશે તાપમાન?
ગરમીથી પરેશાન ગુજરાતીઓ માટે એક સારા સમાચાર પણ સામે આવ્યા છે. હવામાન વિભાગના જણાવ્યા અનુસાર, આગામી ૨૪ કલાક બાદ ગરમીના જોરમાં આંશિક ઘટાડો જોવા મળશે. આગામી ત્રણ દિવસમાં તાપમાનમાં ૨ થી ૪ ડિગ્રી સેલ્સિયસનો ઘટાડો નોંધાઈ શકે છે, જેનાથી કાળઝાળ ગરમીમાં થોડી રાહત મળશે. જોકે, હજુ પણ ચાર દિવસ સુધી મહત્તમ તાપમાન ૪૦ ડિગ્રીથી ઉપર જ રહેવાનું અનુમાન છે.
 
ચોમાસાને લઈને મોટા અપડેટ
એક તરફ ગરમીનો પ્રકોપ છે, તો બીજી તરફ મેઘરાજાના આગમનની આશા પણ જાગી છે. બંગાળની ખાડીના દક્ષિણ ભાગ અને આંદામાન-નિકોબાર ટાપુઓ પર ૧૬ મેની આસપાસ નૈઋત્યનું ચોમાસું બેસવા માટે સાનુકૂળ સંજોગો સર્જાઈ રહ્યા છે. આ ઉપરાંત, ૧૫ મેથી ઉત્તર-પશ્ચિમ ભારતમાં એક નવું વેસ્ટર્ન ડિસ્ટર્બન્સ સક્રિય થવા જઈ રહ્યું છે, જેની અસર હેઠળ પવનોની દિશા બદલાશે અને આગામી દિવસોમાં વાતાવરણમાં પલટો આવવાની શક્યતા છે.
હાલમાં તંત્ર દ્વારા નાગરિકોને બપોરના સમયે બિનજરૂરી બહાર ન નીકળવા અને પુષ્કળ પ્રમાણમાં પ્રવાહી લેવા માટે અપીલ કરવામાં આવી છે.