અમદાવાદ તા.૨૬ : અમદાવાદ જિલ્લાના વિરમગામમાં છેલ્લા 24 કલાકથી પડી રહેલા ભારે વરસાદે જનજીવન પ્રભાવિત કર્યું છે. ખાસ કરીને શહેરનું પ્રખ્યાત ગોળપીઠા હોલસેલ માર્કેટ પાણીમાં ગરકાવ થઈ જતાં વેપારીઓને ભારે આર્થિક ફટકો પડ્યો છે 

સતત વરસાદના કારણે ગોળપીઠા માર્કેટની આસપાસના વિસ્તારોમાં ડ્રેનેજ સિસ્ટમ ઓવરફ્લો થઈ ગઈ. જેના કારણે માર્કેટમાં 4 ફૂટ સુધી પાણી ભરાઈ ગયા. સવાર સુધીમાં 100થી વધુ દુકાનોમાં પાણી ઘૂસી ગયા હતા.

દુકાનોમાં રાખેલો અનાજ, કપડા, ઈલેક્ટ્રોનિક્સનો સામાન અને અન્ય મોંઘી વસ્તુઓ પાણીમાં પલળી જતાં તે સંપૂર્ણપણે બગડી ગઈ છે. પ્રાથમિક અંદાજ મુજબ વેપારીઓને કરોડો રૂપિયાનું નુકસાન થયું છે.

અચાનક આવેલી આ આફતથી વેપારીઓમાં ભારે રોષ જોવા મળી રહ્યો છે. ઘણા વેપારીઓનો આખા વર્ષનો સ્ટોક એક જ રાતમાં બરબાદ થઈ ગયો. વેપારીઓએ જણાવ્યું કે તંત્ર દ્વારા સમયસર પાણીનો નિકાલ ન કરાતા આ સ્થિતિ સર્જાઈ છે.

નુકસાનગ્રસ્ત વેપારીઓએ સરકાર પાસે તાત્કાલિક સર્વે કરીને વળતર આપવાની માંગ કરી છે.

ઘટનાની જાણ થતાં જ નગરપાલિકા અને ફાયર વિભાગની ટીમો ઘટના સ્થળે પહોંચી ગઈ હતી. પાણીનો નિકાલ કરવા માટે પંપો ચલાવવામાં આવી રહ્યા છે. સ્થાનિક ધારાસભ્ય અને અધિકારીઓએ પણ માર્કેટની મુલાકાત લઈને સ્થિતિનો તાગ મેળવ્યો હતો.

હવામાન વિભાગે હજુ આગામી 48 કલાક વરસાદની આગાહી કરી હોવાથી તંત્ર એલર્ટ પર છે.