અમદાવાદ : ગુજરાતીઓ માટે રાજસ્થાન હંમેશાથી મનપસંદ પ્રવાસન સ્થળ રહ્યું છે. આબુથી લઈને ઉદયપુર અને જોધપુર સુધીની મુસાફરી માટે અગાઉ ટ્રેન ટિકિટ મેળવવી એક મોટી માથાકૂટ રહેતી હતી, પરંતુ હવે પ્રવાસીઓ માટે સારા સમાચાર સામે આવ્યા છે. પશ્ચિમ રેલવેના અમદાવાદ મંડળ દ્વારા મુસાફરોની વધતી માંગને ધ્યાનમાં રાખીને સાબરમતી અને લાલગઢ વચ્ચે એક નવી ડેઈલી ટ્રેન સેવાની જાહેરાત કરવામાં આવી છે, જે મુસાફરોની સુવિધામાં મોટો વધારો કરશે.
નવી ટ્રેન નંબર 19407 (સાબરમતી-લાલગઢ) તારીખ 22 જૂનથી શરૂ થશે. આ ટ્રેન દરરોજ સાંજે 17:55 કલાકે સાબરમતીથી ઉપડશે અને બીજા દિવસે સવારે 08:10 કલાકે લાલગઢ પહોંચશે. પરત ફરતી વખતે ટ્રેન નંબર 19408 (લાલગઢ-સાબરમતી) 23 જૂનથી દરરોજ રાત્રે 21:05 કલાકે ઉપડીને બીજા દિવસે સવારે 11:30 કલાકે સાબરમતી પરત ફરશે. આ ટ્રેનમાં ફર્સ્ટ એસીથી લઈને સ્લીપર અને જનરલ ક્લાસ સુધીની તમામ સુવિધાઓ ઉપલબ્ધ રહેશે, જેનું બુકિંગ અત્યારે IRCTC વેબસાઇટ અને PRS કાઉન્ટર્સ પર શરૂ થઈ ગયું છે.
આ ટ્રેન રૂટ અમદાવાદથી શરૂ થઈને મહેસાણા, પાટણ, ભીલડી, રાણીવાડા, ઝાલોર, જોધપુર, મેડતા રોડ, નાગૌર અને બીકાનેર જેવા મહત્વના શહેરોને જોડશે. લાંબા સમયથી રાજસ્થાન જવા માંગતા મુસાફરો માટે આ ટ્રેન એક આશીર્વાદ સમાન સાબિત થશે, કારણ કે તે રાજ્યના વિવિધ ભાગોને સીધા જોડે છે.
બીજી તરફ, રેલવે મુસાફરો માટે એક સાવચેતીના સમાચાર પણ છે. વડોદરા સ્ટેશન પર યાર્ડ રિમોડેલિંગ અને ઈલેક્ટ્રોનિક ઈન્ટરલોકિંગના કામને કારણે 21 જૂનથી 8 જુલાઈ 2026 સુધી અમદાવાદ-વડોદરા ઈન્ટરસિટી સહિતની કેટલીક ટ્રેનો પ્રભાવિત રહેશે. વડોદરા તરફ જતા મુસાફરોએ બાજવા અને વડોદરા વચ્ચેના આ બ્લોકને કારણે ટ્રેન ટાઈમિંગમાં થનારા ફેરફારની નોંધ લેવી જરૂરી છે. અમદાવાદ-વડોદરા ઈન્ટરસિટી, જામનગર-વડોદરા ઈન્ટરસિટી અને વટવા-મેમુ જેવી ટ્રેનોને શોર્ટ ટર્મિનેટ કરવામાં આવશે, જેથી મુસાફરોએ પ્રવાસ કરતા પહેલા નવી સમયસારણી તપાસી લેવી હિતાવહ છે.