વાપી : પંજાબમાં સનસનાટી મચાવનારા હાઈપ્રોફાઈલ 'મેડ સંધુ' હત્યા કેસમાં ગુજરાત એન્ટી ટેરરિઝમ સ્ક્વોડ (ATS) અને વલસાડ સ્પેશિયલ ઓપરેશન ગ્રુપ (SOG) દ્વારા સંયુક્ત ઓપરેશન ચલાવીને એક મોટી સફળતા મેળવવામાં આવી છે. પંજાબમાં આ ગુનો આચરીને ગુજરાતમાં લાંબા સમયથી છૂપાઈને આશરો લેનારા ત્રણ મુખ્ય આરોપીઓને વલસાડ જિલ્લાના વાપી વિસ્તારમાંથી દબૂચી લેવામાં આવ્યા છે. આ ત્વરિત અને સચોટ કાર્યવાહીથી ગેંગસ્ટરો અને શૂટરોમાં ભારે ખળભળાટ મચી ગયો છે.

મળતી વિગતો મુજબ, ગત 3 ઓક્ટોબરના રોજ પંજાબના અમૃતસરમાં આવેલા લોહરકા રોડ પર એક કાર વોશિંગ સેન્ટરની નજીક મેડ સંધુ પર અંધાધૂંધ ફાયરિંગ કરીને તેમની કરપીણ હત્યા કરવામાં આવી હતી. આ ઘટના બાદ સમગ્ર પંજાબમાં ભારે રોષ અને સળવળાટ વ્યાપી ગયો હતો, જેથી પંજાબ પોલીસ આરોપીઓની સતત શોધખોળ કરી રહી હતી. તે દરમિયાન તપાસમાં ચોક્કસ બાતમી મળી હતી કે આ હત્યાકાંડને અંજામ આપનારા શૂટરો ગુજરાતના દક્ષિણ ભાગમાં આવેલા વાપી વિસ્તારમાં છુપાયેલા છે.

આ બાતમીના આધારે ગુજરાત ATS ની ટીમે વલસાડ SOG નો સંપર્ક કરીને વાપીમાં એક ચોક્કસ સ્થળે દરોડો પાડ્યો હતો અને ત્રણેય આરોપીઓને ઝડપી લીધા હતા. પકડાયેલા શૂટરોની ઓળખ હરસિમરનજીત સિંહ ઉર્ફે સીમુ સિગ્ગા, ફતેહ સિંહ અને અરમાન સિંહ તરીકે થઈ છે. પ્રાથમિક પૂછપરછ બાદ આ આરોપીઓનો મોટો ગુનાહિત નેટવર્ક પર્દાફાશ થયો છે અને ગુજરાત ATS દ્વારા પંજાબ પોલીસની ટીમને સોંપવાની કાનૂની તેમજ ટ્રાન્સિટ રિમાન્ડની પ્રક્રિયા હાથ ધરવામાં આવી છે.

ગુજરાતમાં ગુનેગારો અને ભાગેડુઓ માટે કોઈ સુરક્ષિત સ્થાન નથી તે વાત ગુજરાત ATS અને વલસાડ SOG ના આ સફળ ઓપરેશને ફરી એકવાર સાબિત કરી દીધી છે. પંજાબ પોલીસની ટીમ વાપી પહોંચ્યા બાદ આ તમામ આરોપીઓને ટ્રાન્સિટ રિમાન્ડ પર પંજાબ લઈ જવામાં આવશે, જ્યાં તેમની સઘન પૂછપરછ કરીને આ હત્યા પાછળના મુખ્ય કાવતરાખોરો અને અન્ય સહયોગીઓ અંગેના મોટા ખુલાસા થવાની સંભાવના છે.