અમદાવાદ : શહેરના દક્ષિણ ઝોનમાં આવેલા પીપળજ-પીરાણા રોડ પર એક અત્યંત ગંભીર અને હૃદયદ્રાવક દુર્ઘટના સામે આવી છે. પીપળજ-પીરાણા રોડ પર આવેલા દેવ ફાર્મ તરફ જતા માર્ગ પર રમી રહેલી એક નાની બાળકી અચાનક ખુલ્લી ગટરના જોખમી અને ઊંડા પાઈપમાં ખાબકી હોવાની ઘટના બનતા આસપાસના વિસ્તારમાં ભારે અફરાતફરી અને હાહાકાર મચી ગયો છે. બાળકી ગટરમાં આશરે ૪૦ ફૂટ જેટલી ઊંડે ઉતરી ગઈ હોવાની આશંકા વ્યક્ત કરવામાં આવી રહી છે.

પ્રાપ્ત વિગતો અનુસાર, શનિવારે સાંજે સાડા પાંચ વાગ્યાની આસપાસ એક માસૂમ બાળકી પોતાના ભાઈ સાથે ઘર નજીક રમી રહી હતી. તે દરમિયાન અચાનક તેનું ધ્યાન ન રહેતા તે ખુલ્લી ગટરની ચપેટમાં આવી ગઈ હતી અને સીધી અંદર ખાબકી હતી. આ અકસ્માતની જાણ થતા જ પરિવારજનો અને આસપાસના લોકોના શ્વાસ અધ્ધર થઈ ગયા હતા અને ઘટનાસ્થળે લોકોના ટોળા એકઠા થઈ ગયા હતા.

બનાવની ગંભીરતાને ધ્યાનમાં રાખીને ફાયર બ્રિગેડની ટીમ તાત્કાલિક ધોરણે કાફલા સાથે ઘટનાસ્થળે દોડી આવી હતી. ફાયર જવાનો દ્વારા બાળકીને સહીસલામત બહાર કાઢવા માટે અત્યારે યુદ્ધના ધોરણે સઘન રેસ્ક્યુ ઓપરેશન ચલાવવામાં આવી રહ્યું છે. ગટરની ઊંડાઈ વધારે હોવાને કારણે બચાવ કામગીરીમાં ભારે જહેમત ઉઠાવવી પડી રહી છે.

શહેરમાં ખુલ્લી ગટરો અને મેનહોલ ખુલ્લા રાખવાની મ્યુનિસિપલ તંત્રની ગંભીર બેદરકારી સામે સ્થાનિક રહીશો અને નાગરિકોમાં ઉગ્ર રોષ જોવા મળી રહ્યો છે. અગાઉ પણ અનેકવાર રજૂઆતો કરવા છતાં તંત્ર દ્વારા ઢાંકણાં ન બેસાડાતા આખરે એક માસૂમ બાળકી તેનો ભોગ બની છે. હાલ સમગ્ર વિસ્તારમાં બાળકીના હેમખેમ બહાર આવવા માટે પ્રાર્થનાઓનો દૌર શરૂ છે અને તંત્ર વિરૂદ્ધ લોકોમાં ભારે આક્રોશ પ્રવર્તી રહ્યો છે.