દાહોદ તા.૩૦ :  દાહોદ શહેરમાં થોડા દિવસો અગાઉ થયેલી ઘરફોડ ચોરીના ગુનાનો ભેદ દાહોદ ટાઉન એ ડિવિઝન પોલીસે ઉકેલી નાખ્યો છે. પોલીસે આ ગુનામાં સંડોવાયેલી રીઢા તસ્કર ટોળકીના બે આરોપીઓને ઝડપી પાડી તેમની પાસેથી કુલ રૂ. 5.25 લાખનો મુદ્દામાલ કબજે કર્યો છે.

શહેરના એક બંધ મકાનને નિશાન બનાવી તસ્કરોએ સોના-ચાંદીના દાગીના અને રોકડ રકમની ચોરી કરી હતી. ઘટનાની ગંભીરતાને ધ્યાને લઈ દાહોદ ટાઉન એ ડિવિઝન પીઆઈની સૂચનાથી અલગ-અલગ ટીમો બનાવવામાં આવી હતી. 

પોલીસે સીસીટીવી ફૂટેજ અને ટેક્નિકલ સર્વેલન્સના આધારે તપાસ હાથ ધરી હતી. બાતમીના આધારે પોલીસે વોચ ગોઠવી બંને આરોપીઓને ઝડપી લીધા હતા. પૂછપરછ દરમિયાન આરોપીઓએ ગુનાની કબૂલાત કરી હતી.

પકડાયેલા આરોપીઓ પાસેથી પોલીસે ચોરીમાં ગયેલા સોના-ચાંદીના દાગીના, રોકડ રકમ તેમજ ગુનામાં વપરાયેલ સાધનો મળી કુલ રૂ. 5,25,000નો મુદ્દામાલ રીકવર કર્યો છે.

પોલીસની પ્રાથમિક તપાસમાં આ ટોળકી અગાઉ પણ અનેક ઘરફોડ ચોરીઓમાં સંડોવાયેલી હોવાનું સામે આવ્યું છે. હાલ બંને આરોપીઓની સઘન પૂછપરછ કરવામાં આવી રહી છે અને ટોળકીના અન્ય સાગરીતો સુધી પહોંચવા માટે વધુ તપાસ હાથ ધરાઈ છે.

આ સફળ કામગીરીમાં દાહોદ ટાઉન એ ડિવિઝન પોલીસ સ્ટેશનનો સ્ટાફ જોડાયો હતો.