સુરતના અઠવાલાઇન્સ વિસ્તારમાં આવેલા સર્કિટ હાઉસ ખાતે કોળી સમાજની એક અગત્યની મિટિંગ મળી હતી. અખિલ ભારતીય કોળી સમાજના રાષ્ટ્રીય અધ્યક્ષ વિરેન્દ્ર કશ્યપની વિશેષ ઉપસ્થિતિમાં આ કાર્યક્રમ યોજાયો હતો. દિલ્હી ખાતે આગામી સમયમાં યોજાનારા 12 માં અધિવેશનની પૂર્વ તૈયારીઓ માટે આ ચર્ચા કરવામાં આવી હતી. સમાજના આગેવાનોએ મોટી સંખ્યામાં હાજર રહીને સંગઠનને મજબૂત બનાવવા પર ભાર મૂક્યો હતો 

   અખિલ ભારતીય કોળી સમાજના રાષ્ટ્રીય પ્રમુખ વિરેન્દ્ર કશ્યપે મિટિંગમાં એક મહત્વનું નિવેદન આપ્યું હતું. આગામી 21 જૂને દિલ્હી ખાતે  રાષ્ટ્રીય કક્ષાનું મોટું સંમેલન મળશે. પૂર્વ રાષ્ટ્રપતિ રામનાથ કોવિંદ આ કાર્યક્રમની અધ્યક્ષતા કરશે. ઉપરાંત દિલ્હીના મુખ્યમંત્રી રેખા ગુપ્તા પણ આ કાર્યક્રમમાં હાજર રહેશે. આ અધિવેશન દ્વારા સમાજ પોતાની એકતા અને શક્તિનું પ્રદર્શન કરશે.

વિરેન્દ્ર કશ્યપે સમાજની ચિંતા કરતા વધુમાં કહ્યું કે, હાલમાં કોળી સમાજ અનેક પ્રકારની ગંભીર સમસ્યાનો સામનો કરી રહ્યો છે. શૈક્ષણિક, સામાજિક અને આર્થિક ક્ષેત્રે સમાજ હજુ પણ પાછળ છે. આ સમાજનો સમાવેશ અનુસૂચિત જાતિ (SC), અનુસૂચિત જનજાતિ (ST) અને ઓબીસી (OBC) જેવી અલગ-અલગ કેટેગરીમાં થાય છે. આ વિષયો પર કેન્દ્ર અને રાજ્ય સરકાર ગંભીરતાથી વિચાર કરે તે જરૂરી છે. અધિવેશનમાં આ તમામ મુદ્દાઓ પર વિસ્તૃત રજૂઆત કરવામાં આવશે.

 સુરતમાં મળેલી બેઠકમાં અખિલ ભારતીય કોળી સમાજના રાષ્ટ્રીય અધ્યક્ષ વિરેન્દ્ર કશ્યપે નિવેદન આપ્યું કે, દેશમાં કોળી સમાજની વસ્તી અંદાજે 22 Crore જેટલી મોટી છે. આટલી વિશાળ જનસંખ્યા હોવા છતાં રાજકીય અને વહીવટી ક્ષેત્રે પૂરતું પ્રતિનિધિત્વ મેળવવા સમાજ ઝંઝૂમી રહ્યો છે. સુરતની બેઠકમાં પૂર્વ ધારાસભ્ય અને ભાજપ પ્રદેશ ઉપાધ્યક્ષ ઝંખના પટેલ તેમજ પૂર્વ પ્રમુખ અજીત પટેલે હાજરી આપી હતી. સમાજના ઉત્થાન માટે નવી રણનીતિ તૈયાર કરવામાં આવી છે. આગામી અધિવેશન સરકારનું ધ્યાન ખેંચવા માટે એક મહત્વનું માધ્યમ બનશે.