ગાંધીનગર તા.૨૦ : જરાતમાં ચોમાસાની વધુ એક સક્રિય સિસ્ટમ સક્રિય થઈ છે. હવામાન વિભાગની આગાહી મુજબ અરબ સાગરમાં સાયક્લોનિક સર્ક્યુલેશન સક્રિય થવાને કારણે રાજ્યમાં આગામી 7 દિવસ સુધી વરસાદની શક્યતા રહેશે. દરિયાકાંઠાના કચ્છ, દેવભૂમિ દ્વારકા, પોરબંદર, જૂનાગઢ, અમરેલી અને ગીર સોમનાથ જિલ્લાઓમાં ભારેથી અતિભારે વરસાદની આગાહી સાથે ઓરેન્જ એલર્ટ જાહેર કરવામાં આવ્યું છે.

હવામાન વિભાગના જણાવ્યા મુજબ સાયક્લોનિક સર્ક્યુલેશનના કારણે પવનની ગતિ કલાકના 40-50 કિમી સુધી પહોંચી શકે છે. દરિયાની સપાટી પર 2-3 મીટર ઊંચા મોજા ઉછળવાની શક્યતા હોવાથી માછીમારોને આગામી 7 દિવસ સુધી દરિયો ન ખેડવાની ચેતવણી આપવામાં આવી છે. દરિયાકાંઠે રહેતા લોકોને સલામત સ્થળે ખસી જવા સૂચના આપવામાં આવી છે.

રાજ્ય સરકારે તમામ તંત્રને એલર્ટ પર રાખ્યા છે. નીચાણવાળા અને દરિયાકાંઠાના વિસ્તારોમાં પાણી ભરાવાની શક્યતા હોવાથી તંત્રને પૂરતી તૈયારી રાખવા જણાવાયું છે. SDRF અને NDRFની ટીમોને સ્ટેન્ડબાય પર રાખવામાં આવી છે. મહાનગરપાલિકાઓ અને જિલ્લા કલેક્ટર કચેરીઓને કંટ્રોલ રૂમ 24x7 ચાલુ રાખવા સૂચના આપવામાં આવી છે.

ખેડૂતોને પોતાના પાક અને ખેતીના સાધનોની કાળજી લેવા અનુરોધ કરાયો છે. વરસાદના કારણે ખેતરોમાં પાણી ભરાય તો નુકસાન થઈ શકે છે. રાજ્યના આંતરિક ભાગો જેવા કે રાજકોટ, અમદાવાદ, સુરેન્દ્રનગર અને સૌરાષ્ટ્રના અન્ય ભાગોમાં મધ્યમથી ભારે વરસાદ પડવાની શક્યતા છે.

હવામાન વિભાગે નાગરિકોને અપીલ કરી છે કે વરસાદ દરમિયાન બિનજરૂરી ઘરની બહાર નીકળે, ઝાડ નીચે અને વીજળીના થાંભલાથી દૂર રહે. રસ્તા પર પાણી ભરાયેલા હોય તો વાહન ચલાવતી વખતે સાવધાની રાખે. તંત્ર દ્વારા પરિસ્થિતિ પર સત નજર રાખવામાં આવી રહી છે.