બનાસકાંઠા તા.24 : બનાસકાંઠા જિલ્લાના દાંતીવાડા સ્થિત સરદારકૃષિનગર દાંતીવાડા કૃષિ યુનિવર્સિટી (SDAU) ખાતે પશુ સુધારણા વિષય પર રાષ્ટ્રીય સેમિનાર યોજાયો હતો. આ સેમિનારમાં ગુજરાત વિધાનસભાના અધ્યક્ષ શંકરભાઈ ચૌધરી મુખ્ય અતિથિ તરીકે ઉપસ્થિત રહ્યા હતા.

વિધાનસભા અધ્યક્ષ શંકરભાઈ ચૌધરીએ પોતાના સંબોધનમાં કહ્યું કે બનાસકાંઠા એ પશુપાલનનું હબ છે અને બનાસ ડેરીના કારણે સમગ્ર દેશમાં સફેદ ક્રાંતિનું મોડલ બન્યું છે. યુનિવર્સિટીમાં થતું સંશોધન માત્ર લેબ પૂરતું સીમિત ન રહેવું જોઈએ, પરંતુ તેનું જ્ઞાન છેવાડાના પશુપાલક સુધી પહોંચવું જોઈએ. 

તેમણે કહ્યું કે આધુનિક વેટરનરી વિજ્ઞાન, એનિમલ બ્રીડિંગ, જીનેટિક્સ અને કૃત્રિમ બીજદાન જેવી ટેક્નોલોજીથી પશુઓની ઓલાદ સુધારી શકાય છે, જેનાથી દૂધ ઉત્પાદન વધશે અને પશુપાલકોની આવક બમણી થશે. તેમણે પશુઓમાં આવતા નવા રોગો સામે રસીકરણ અને સારવાર માટે યુનિવર્સિટી વૈજ્ઞાનિકોને વધુ કામ કરવા આહ્વાન કર્યું હતું.

આ રાષ્ટ્રીય સેમિનારમાં એનિમલ જેનેટિક્સ એન્ડ બ્રીડિંગ, પશુ આહાર, ડેરી સાયન્સ અને પશુરોગ નિદાન વિષયો પર ચર્ચા કરાઈ હતી.

દેશની વિવિધ કૃષિ યુનિવર્સિટીઓમાંથી 100થી વધુ વૈજ્ઞાનિકો, વિદ્યાર્થીઓ અને પ્રગતિશીલ પશુપાલકોએ ભાગ લીધો હતો.

પશુઓમાં કૃત્રિમ બુદ્ધિમત્તા (AI) આધારિત સંવર્ધન અને સેક્સ સોર્ટેડ સીમેન ટેક્નોલોજી પર વિશેષ પ્રેઝન્ટેશન અપાયું હતું.

બનાસકાંઠાના પશુપાલકોને ઓછા ખર્ચે વધુ દૂધ ઉત્પાદન કેવી રીતે મેળવવું તે અંગે માર્ગદર્શન આપવામાં આવ્યું હતું.

કાર્યક્રમમાં SDAUના કુલપતિ, ડીન, વેટરનરી કોલેજના પ્રોફેસરો અને બનાસ ડેરીના અધિકારીઓ પણ ઉપસ્થિત રહ્યા હતા.