અમદાવાદ શહેરના આઈકોનિક સાબરમતી રિવરફ્રન્ટ પર પ્રેમી યુગલોને ટાર્ગેટ કરીને તેમને ડરાવી-ધમકાવીને નાણાં પડાવતી ચકચારી ઘટનાઓ અટકવાનું નામ નથીલઈ રહી. રિવરફ્રન્ટ વિસ્તારમાં શાંતિથી બેઠેલા કે ફરવા આવેલા યુગલોને બ્લેકમેલ કરી ખંડણી ઉઘરાવતા એક કુખ્યાત શખ્સ સામે વધુ એક ગંભીર ફરિયાદ નોંધાઈ છે. અગાઉ પણ આવા જ પ્રકારના ગુનામાં સાબરમતી રિવરફ્રન્ટ પોલીસે આરોપીની ધરપકડ કરી હતી, પરંતુ તેની પૂછપરછ અને તપાસ દરમિયાન નવા ચોંકાવનારા ખુલાસાઓ સામે આવી રહ્યા છે.

મળતી માહિતી અનુસાર, અમદાવાદના ગોમતીપુર વિસ્તારમાં રહેતો હુસૈન શેખ નામનો શખ્સ રિવરફ્રન્ટ પર આવતા યુગલો પર બાજ નજર રાખતો હતો અને તેમને ડરાવીને મોટા પ્રમાણમાં પૈસા પડાવતો હતો. ગત નવરાત્રીના દિવસો દરમિયાન એક યુવક પોતાની સ્ત્રી મિત્ર સાથે મોડી રાત્રે રિવરફ્રન્ટ વિસ્તારમાં કારમાં બેઠો હતો. આ દરમિયાન આરોપી હુસૈન શેખ ત્યાં પહોંચી ગયો હતો અને કારમાં બેઠેલા યુગલના ગુપ્ત રીતે પોતાના મોબાઈલ ફોનમાં ફોટો અને વીડિયો લીધા હોવાનું કહીને તેમને બ્લેકમેલ કરવાનું શરૂ કર્યું હતું.

આરોપીએ સોશિયલ મીડિયા પર ફોટો-વીડિયો વાયરલ કરી દેવાની કે પરિવારમાં બદનામ કરવાની ધમકી આપીને ડરાવ્યા હતા અને પઠાણી ઉઘરાણી કરીને યુવક પાસેથી 10 હજાર રૂપિયા પડાવી લીધા હતા. જોકે, આટલેથી સંતોષ ન માનતા હસમુખ કે ખંડણીખોર હુસૈન શેખે ત્યારબાદ પણ યુવતી પાસે વધુ રૂપિયાની માંગણી કરવાનું ચાલુ રાખ્યું હતું, જેના કારણે કંટાળીને ભોગ બનનારે આખરે પોલીસનો સંપર્ક કર્યો હતો.

આ મામલાની ગંભીરતાને ધ્યાનમાં રાખીને સાબરમતી રિવરફ્રન્ટ પોલીસે વધુ એક ફરિયાદ નોંધીને કાયદેસરની કડક તપાસ શરૂ કરી છે. પોલીસ સૂત્રોના જણાવ્યા અનુસાર, આરોપી અગાઉ પણ આવા અનેક યુગલોને શિકાર બનાવી ચૂક્યો છે કે કેમ અને તેની સાથે આ ગુનામાં અન્ય કોઈ સંડોવાયેલું છે કે નહીં, તે અંગે સઘન તપાસ હાથ ધરવામાં આવી છે. રિવરફ્રન્ટ પર સુરક્ષા વ્યવસ્થા વધુ સઘન બનાવવા અને આવા અસામાજિક તત્વો સામે દાખલારૂપ કાર્યવાહી કરવા માટે નાગરિકો દ્વારા પણ માંગ કરવામાં આવી રહી છે.