ગાંધીનગર: રાજ્યના મુખ્યમંત્રી ભૂપેન્દ્રભાઈ પટેલે સમસ્ત ગુજરાતના નાગરિકો તેમજ વિશ્વભરમાં વસતા ગુજરાતી પરિવારોને દીપાવલી પર્વ અને વિક્રમ સંવત ૨૦૮૩ ના નૂતન વર્ષની હાર્દિક શુભકામનાઓ પાઠવી છે. મુખ્યમંત્રીએ આ નવા વર્ષે સૌના જીવનમાં સુખ, શાંતિ, સમૃદ્ધિ, સંતોષ અને ઉત્તમ આરોગ્યનો પ્રકાશ પથરાય તેમજ દરેક પરિવાર આનંદ-ઉલ્લાસથી પરિપૂર્ણ બને તેવી મંગળ અભ્યર્થના વ્યક્ત કરી છે.

‘સંકલ્પથી સિદ્ધિ’ અને સુશાસનની સતત વિકાસયાત્રા:
પોતાના શુભેચ્છા સંદેશમાં મુખ્યમંત્રી ભૂપેન્દ્રભાઈ પટેલે જણાવ્યું હતું કે, વડાપ્રધાન નરેન્દ્રભાઈ મોદીના નેતૃત્વમાં સાત કરોડ ગુજરાતીઓની સામૂહિક ઊર્જા, આત્મનિર્ભરતા અને કૌશલ્યના બળે ‘વિકસિત ગુજરાત’ દ્વારા ‘વિકસિત ભારત’ના સંકલ્પને સાકાર કરવા આપણે ‘વી વિલ ડુ ઇટ’ ના ધ્યેય સાથે અગ્રેસર બનવાનું છે. તેમણે ઉમેર્યું હતું કે દીપોત્સવીનું પર્વ માત્ર રોશનીનો ઉત્સવ નથી, પરંતુ આર્થિક સમૃદ્ધિ, સુશાસન, સુરક્ષા અને સામાજિક એકતાના નવા સંકલ્પો અપનાવવાની પ્રેરણા આપે છે. વર્ષ ૨૦૦૧ થી શરૂ થયેલી સેવા અને સુશાસનની યાત્રાને લીધે આજનું ગુજરાત વૈશ્વિક સ્તરે ‘ગ્રોથ એન્જિન’ બન્યું છે.

પર્યાવરણ સંરક્ષણ અને યુવા પેઢીની ભાગીદારી:
મુખ્યમંત્રીએ વધુમાં જણાવ્યું હતું કે વડાપ્રધાન નરેન્દ્રભાઈ મોદીના ‘મિશન લાઈફ’ અંતર્ગત રાજ્ય સરકારે ગ્રીન ક્રેડિટ અને ‘એક પેડ મા કે નામ ૩.૦’ જેવા અભિયાનો હાથ ધરીને પર્યાવરણ સંરક્ષણ ક્ષેત્રે નોંધપાત્ર સિદ્ધિઓ મેળવી છે. કચ્છના રણથી લઈને ધોલેરા જેવા આધુનિક વિકાસ ક્ષેત્રોમાં જળ સંચય અને વૃક્ષારોપણ દ્વારા પર્યાવરણીય સંતુલન જાળવવાના પ્રયાસો થઈ રહ્યા છે. આ પર્યાવરણીય અભિયાનોમાં રાજ્યની યુવા પેઢી પણ સક્રિય સહભાગી બને તેવી અપેક્ષા સાથે તેમણે સૌ નાગરિકોને નૂતન વર્ષે આત્મનિર્ભર ભારત માટે વિકસિત ગુજરાતના સંવાહક બનવા ભાવભર્યા આહવાન સાથે શુભેચ્છાઓ પાઠવી હતી.