​વલસાડ:નેશનલ હાઈવે-૪૮ પર આવેલા ધમદાચી ખાતે નિર્માણ પામેલા અત્યાધુનિક ઓવરબ્રિજની ગુણવત્તા સામે અત્યારે ગંભીર પ્રશ્નાર્થચિહ્નો ખડા થયા છે. કરોડો રૂપિયાના ખર્ચે તૈયાર કરવામાં આવેલા આ મહત્વપૂર્ણ પ્રોજેક્ટમાં કામગીરીની પોલ માત્ર દસ દિવસમાં જ ખુલી ગઈ છે. બ્રિજને વાહનચાલકોની અવરજવર માટે ખુલ્લો મુકવામાં આવ્યો તેને માંડ દસ દિવસ થયા છે, ત્યાં જ બ્રિજની સપાટી પર મોટા પ્રમાણમાં ગાબડાં (ખાડા) પડી ગયા છે, જે તંત્રની કામગીરી પર સીધા જ સવાલો ઉભા કરી રહ્યા છે.
​સૌથી આશ્ચર્યજનક અને ચોંકાવનારી બાબત એ છે કે, હજુ સુધી આ બ્રિજનું સત્તાવાર રીતે લોકાર્પણ પણ કરવામાં આવ્યું નથી, તેમ છતાં તેને વહેલી તકે કાર્યરત કરી દેવામાં આવ્યો હતો. બ્રિજની સપાટી પર પડેલા આ ખાડાઓ રસ્તાની સામાન્ય સમસ્યા નથી, પરંતુ બાંધકામમાં વપરાયેલી નબળી સામગ્રી અને એન્જિનિયરિંગની ખામીનો જીવંત પુરાવો છે. નેશનલ હાઈવે ઓથોરિટી ઓફ ઇન્ડિયા (NHAI) ની કામગીરી અહીં ભારે શંકાના દાયરામાં આવી ગઈ છે.
​સ્થાનિક રહીશો અને વાહનચાલકોમાં આ બાબતે ભારે રોષ જોવા મળી રહ્યો છે. લોકોનું કહેવું છે કે, જે બ્રિજ પર હજુ તો વાહનોની અવરજવર શરૂ થઈ છે, ત્યાં જ આવી દુર્દશા થવી તે મોટા ભ્રષ્ટાચાર તરફ ઈશારો કરે છે. આ પરિસ્થિતિ ભવિષ્યમાં કોઈ ગંભીર અકસ્માતને નોતરે તેવી શક્યતા નકારી શકાય તેમ નથી. વધુમાં, સમસ્યાને દૂર કરવાને બદલે તંત્ર દ્વારા ખાડાઓમાં માત્ર 'લીપાપોઢી' કરીને સંતોષ માનવામાં આવી રહ્યો છે, જેનાથી લોકોમાં અસંતોષની લાગણી વધુ વકરી છે.
​હવે સવાલ એ થાય છે કે, લાખો-કરોડોના ખર્ચે બનતા જાહેર માર્ગો અને બ્રિજની ગુણવત્તાની જવાબદારી કોની? તાત્કાલિક ધોરણે આ સમગ્ર પ્રોજેક્ટની ઉચ્ચસ્તરીય તપાસ કરવામાં આવે અને જવાબદાર કોન્ટ્રાક્ટરો તેમજ સંબંધિત અધિકારીઓ સામે કડક કાર્યવાહી કરવામાં આવે તેવી પ્રબળ લોકમાંગ ઉઠી છે. જો સમયસર પગલાં લેવામાં નહીં આવે, તો આ બ્રિજ લોકો માટે આશીર્વાદને બદલે અભિશાપ સાબિત થઈ શકે છે.