સુરતમાં ભારે વરસાદ અને ખાડી પૂર બાદ સર્જાયેલી સ્થિતિ વચ્ચે હવે અસરગ્રસ્ત વિસ્તારોમાં પીવાના પાણીની સમસ્યાએ લોકોનો રોષ ચરમસીમાએ પહોંચાડ્યો છે. કાપોદ્રા વિસ્તારની અનેક સોસાયટીઓમાં પાણી ભરાઈ જતાં લોકો રોજિંદા જીવન માટે સંઘર્ષ કરી રહ્યા છે. આ દરમિયાન વોર્ડ નંબર-4ના ભાજપના કોર્પોરેટર હંસા ગજેરા અસરગ્રસ્તોની મુલાકાતે પહોંચતા સ્થાનિક મહિલાઓએ તેમને ઘેરી લઈને ઉગ્ર રજૂઆતો કરી હતી. સમગ્ર ઘટનાનો વીડિયો સોશિયલ મીડિયામાં ઝડપથી વાયરલ થઈ રહ્યો છે.

સ્થાનિકોના જણાવ્યા મુજબ, ભારે વરસાદ બાદ સોસાયટીઓમાં પાણી ભરાઈ જવાથી પીવાનું પાણી, ઘરવખરી અને રસોડાનો સામાન બગડી ગયો છે. અનેક પરિવારોને સ્વચ્છ પીવાનું પાણી   પણ ઉપલબ્ધ નથી. આવી સ્થિતિમાં તંત્ર તરફથી પૂરતી અને સમયસર મદદ ન મળતા લોકોમાં ભારે નારાજગી જોવા મળી રહી છે

કોર્પોરેટર સ્થળ પર પહોંચતા જ મહિલાઓ સહિત સ્થાનિક રહીશોએ પાણીની અછત અને રાહત વ્યવસ્થાને લઈને સવાલો ઉઠાવ્યા હતા. લોકોએ આક્ષેપ કર્યો કે ચૂંટણી દરમિયાન વારંવાર વિસ્તારમાં આવનારા જનપ્રતિનિધિઓ મુશ્કેલીના સમયમાં દેખાતા નથી. લોકોનું કહેવું હતું કે હાલ સૌથી મોટી જરૂરિયાત પીવાના પાણીની છે અને તાત્કાલિક ટેન્કરની વ્યવસ્થા કરવી જોઈએ.

   વાતચીત દરમિયાન કોર્પોરેટરે લોકોને શાંતિ રાખવા અને કામગીરી ચાલી રહી હોવાનું જણાવ્યું હતું. જોકે, આ વાતથી સ્થાનિકો વધુ નારાજ બન્યા હતા અને સ્થળ પર ઉગ્ર બોલાચાલી થઈ હતી. મહિલાઓએ સ્પષ્ટ શબ્દોમાં જણાવ્યું કે લોકોને સમજાવવાને બદલે તાત્કાલિક રાહત અને પીવાના પાણીની વ્યવસ્થા કરવામાં આવે.

ઘટના દરમિયાન કોર્પોરેટર તરફથી કરાયેલા કેટલાક નિવેદનો પણ ચર્ચાનો વિષય બન્યા હતા. ત્યારબાદ સ્થાનિકોએ ફરીથી પાણીના નિકાલ, પીવાના પાણીના ટેન્કર અને ઝડપી રાહત કામગીરીની માંગ કરી હતી.

આ સમગ્ર ઘટનાનો વીડિયો સોશિયલ મીડિયા પર વાયરલ થતાં સુરતના પૂર બાદની કામગીરી, રાહત વ્યવસ્થા અને સ્થાનિક તંત્રની કામગીરી અંગે ફરી ચર્ચા શરૂ થઈ છે. અસરગ્રસ્ત વિસ્તારોના રહીશોનું કહેવું છે કે પાણીનો નિકાલ, સ્વચ્છ પીવાનું પાણી અને અન્ય જરૂરી સુવિધાઓ ઝડપથી ઉપલબ્ધ કરાવવામાં આવે જેથી સામાન્ય જનજીવન ફરીથી રાબેતા મુજબ થઈ શકે