રાજકોટ:લાંચ રૂશ્વત વિરોધી બ્યુરો (એ.સી.બી.) દ્વારા ભ્રષ્ટાચારી અધિકારીઓ સામે લાલ આંખ કરીને વધુ એક મોટી અને સફળ ટ્રેપનું આયોજન કરવામાં આવ્યું છે. અમદાવાદ ગ્રામ્ય જિલ્લાના બોપલ પોલીસ સ્ટેશનમાં ફરજ બજાવતા મહિલા પોલીસ સબ ઇન્સ્પેક્ટર (પીએસઆઈ) પ્રિતલબેન જશુભાઇ ચૌધરી અને શીલજ બીટના આસિસ્ટન્ટ હેડ કોન્સ્ટેબલ દિલીપકુમાર મફતભાઇ ભોઈ વિરૂદ્ધ રૂા.૫,૦૦,૦૦૦ની મસમોટી લાંચ લેવાના કેસમાં કાયદેસરની કાર્યવાહી હાથ ધરવામાં આવી છે. આ સફળ ઓપરેશન દરમિયાન હેડ કોન્સ્ટેબલ દિલીપકુમાર ભોઈ લાંચની રકમ સ્વીકારતા રંગેહાથ પકડાઈ ગયા છે, જ્યારે મહિલા પીએસઆઈ પ્રિતલબેન ચૌધરી સ્થળ પર હાજર ન મળી આવતા તેમની શોધખોળ શરૂ કરાઈ છે.

ગુનો નહીં નોંધવા માટે પ્રથમ ૧૦ લાખની માંગણી કરાઈ હતી:
આ કેસની વિગત એવી છે કે, આ કામના ફરિયાદી વિરૂદ્ધ બોપલ પોલીસ સ્ટેશનમાં એક અરજી થયેલી હતી. આ અરજીની તપાસ બોપલ પોલીસ સ્ટેશનના મહિલા પીએસઆઈ પ્રિતલબેન ચૌધરી કરી રહ્યા હતા. આ તપાસના અંતે ફરિયાદી વિરૂદ્ધ કોઈ ગુનો દાખલ નહીં કરવાના બદલામાં પીએસઆઈ પ્રિતલબેન ચૌધરી તથા હેડ કોન્સ્ટેબલ દિલીપકુમાર ભોઈએ ફરિયાદી પાસે પ્રથમ રૂા.૧૦,૦૦,૦૦૦ની લાંચની માંગણી કરી હતી. ફરિયાદીએ આટલી મોટી રકમ આપવા અંગે રકઝક કરતા અંતે બન્ને આરોપીઓ રૂા.૫,૦૦,૦૦૦ લેવા માટે સંમત થયા હતા.

શીલજ બીટની સાયબર ક્રાઇમ ઓફિસમાં ગોઠવાયું છટકું:
ફરિયાદી આ લાંચના નાણાં આપવા માંગતા ન હોવાથી, તેઓએ ખેડા એ.સી.બી. પોલીસ સ્ટેશન નડીયાદ ખાતે જઈને આ અંગે વિગતવાર ફરિયાદ નોંધાવી હતી. ફરિયાદના આધારે ખેડા એ.સી.બી.ની ટીમે બે સરકારી પંચોને સાથે રાખીને તા.૨૬/૦૬/૨૦૨૬ના રોજ બોપલ પોલીસ સ્ટેશન હેઠળની શીલજ બીટમાં આવેલી સાયબર ક્રાઇમની ઓફિસમાં લાંચનું છટકું ગોઠવ્યું હતું.

આ ટ્રેપ દરમિયાન આરોપી હેડ કોન્સ્ટેબલ દિલીપકુમાર ભોઈએ ફરિયાદી સાથે હેતુલક્ષી વાતચીત કરી હતી અને રૂા.૫,૦૦,૦૦૦ની લાંચની રકમ સ્વીકારી હતી. લાંચના નાણાં મેળવ્યા બાદ હેડ કોન્સ્ટેબલ દિલીપકુમારે પોતાના મોબાઈલ ફોનથી પીએસઆઈ પ્રિતલબેન ચૌધરીને ફોન કર્યો હતો અને સ્પીકર ફોન ચાલુ રાખીને લાંચના નાણાં મળી ગયા હોવાની પુષ્ટિ કરી હતી. આ સાંભળીને પીએસઆઈ પ્રિતલબેન ચૌધરીએ પોતાની સંમતિ આપી હતી. ભાંડો ફૂટતા જ એ.સી.બી.ની ટીમે ત્રાટકીને હેડ કોન્સ્ટેબલ દિલીપકુમાર ભોઈને લાંચની પૂરેપૂરી રકમ સાથે સ્થળ પરથી જ દબોચી લીધા હતા, જ્યારે પીએસઆઈ પ્રિતલબેન ચૌધરી ઘટનાસ્થળે હાજર ન મળી આવ્યા હતા.

એ.સી.બી.ના ઉચ્ચ અફસરોની દેખરેખ હેઠળ કાર્યવાહી:
આ સફળ ટ્રેપની કામગીરી ખેડા એ.સી.બી. પોલીસ સ્ટેશન નડીયાદના પોલીસ ઇન્સ્પેક્ટર એ.આર.પ્રજાપતિ તથા તેમની ટીમ દ્વારા કરવામાં આવી હતી. આ સમગ્ર ઓપરેશનનું સુપરવિઝન એ.સી.બી. અમદાવાદ એકમના મદદનીશ નિયામક એમ.એચ.પુવાર દ્વારા કરવામાં આવ્યું હતું, જ્યારે એ.સી.બી. અમદાવાદના નાયબ નિયામક અને ઇન્ચાર્જ અધિકારી હરેશ મેવાડાના સીધા માર્ગદર્શન હેઠળ બન્ને આરોપીઓ વિરૂદ્ધ ગુનો નોંધી આગળની તપાસ હાથ ધરવામાં આવી છે. બન્ને આરોપીઓએ પોતાના રાજ્ય સેવક તરીકેના હોદ્દાનો દુરુપયોગ કરી ગુનાહિત ગેરવર્તણૂક આચરી હોવાથી એ.સી.બી.એ કાયદાનો ગાળિયો વધુ મજબૂત કર્યો છે.