દક્ષિણ ગુજરાતથી ચોમાસુ આગળ વઘીને મધ્ય ગુજરાત અને સૌરાષ્ટ્રના કેટલાક વિસ્તારોમાં પહોંચી ગયું છે. ચોમાસુ સક્રિય થવાની સાથે જ દક્ષિણ ગુજરાતમાં ભારે વરસાદ વરસ્યો છે. ખાસ કરીને વાપી, ઉમરગામ, ઉમરપાડા, પારડી, વાંસદા સહીતના તાલુકામાં નોંધપાત્ર વરસાદ નોંધાયો છે.

આજે 1 જુલાઈને બુધવારના રોજ સવારના 6 વાગ્યાથી રાતના 8 વાગ્યા સુધીના સમયગાળામાં સૌથી વધુ વરસાદ વલસાડ જિલ્લાના વાપીમાં નોંધાયો છે. વાપીમાં 168 મી.મી. એટલે કે, સાડા છ ઈંચથી વધુ વરસાદ વરસ્યો છે. વલસાડના જ ઉમરપાડા તાલુકામાં પણ 131 મી.મી. એટલે કે, સવા પાંચ ઈંચ જેટલો વરસાદ નોંધાયો છે. જૂનાગઢના ભેંસાણમાં ચોમાસુ બેસતાની સાથે જ સવા ચાર ઈંચ વરસાદ વરસ્યો છે.