ગાંધીનગર :રાજ્યના પાટનગર ગાંધીનગરમાં સેક્ટર-11ના કેસરિયા ગરબા ગ્રાઉન્ડ ખાતે વિજયાદશમી નિમિત્તે રામલીલા અને રાવણ દહનનો જાહેર કાર્યક્રમ યોજાયો હતો. ધારાસભ્ય રીટાબેન પટેલ પ્રેરિત સહાય ફાઉન્ડેશન દ્વારા આ કાર્યક્રમનું આયોજન કરવામાં આવ્યું હતું. સાંજે 6 વાગ્યે રામલીલાનો પ્રારંભ કરવામાં આવ્યો હતો. ત્યારબાદ 65 ફૂટ ઊંચા રાવણના વિશાળ પૂતળાનું દહન કરવામાં આવ્યું હતું. ખાસ વાત એ રહી કે રાવણની સાથે મેઘનાથ અને કુંભકર્ણનાં પૂતળાંનું પણ દહન કરવામાં આવ્યું હતું. આ કાર્યક્રમ દ્વારા વિજયાદશમીની પરંપરાગત ઉજવણીને જીવંત કરવામાં આવી હતી.