અમદાવાદ : અમદાવાદ સહિત રાજ્યભરમાં ઓનલાઈન કેબ અને ઓટો રિક્ષા ચાલકોના વિવિધ પ્રશ્નોના નિરાકરણ માટે 'રોજગાર બચાવો આંદોલન'ના નેજા હેઠળ આગામી ૭ થી ૧૦ સપ્ટેમ્બર દરમિયાન ચાર દિવસીય બંધનું એલાન આપવામાં આવ્યું છે, જેને લઈને આજે સવારે ૧૧ કલાકે અમદાવાદના જીએમડીસી (GMDC) ગ્રાઉન્ડ ખાતે વિવિધ એસોસિએશનોની એક મહત્ત્વપૂર્ણ બેઠક મળવા જઈ રહી છે.

આ વિરોધ પ્રદર્શન પાછળનું મુખ્ય કારણ ઑનલાઇન કેબ કંપનીઓ દ્વારા ડ્રાઇવરોનું થતું કથિત આર્થિક શોષણ, શહેરમાં બેરોકટોક દોડતી ગેરકાયદેસર ટેક્સીઓ અને અન્ય વ્યાપારી પ્રશ્નો છે, જેના વિરોધમાં કેટલાક ટેક્સી ચાલક યુનિયનો અને ઓટો રિક્ષા એસોસિએશનો સક્રિયપણે જોડાઈને ડ્રાઇવરોને ન્યાયી રોજગારી અને યોગ્ય કમિશન અપાવવાની માંગ કરી રહ્યા છે.

બીજી બાજુ, આ આંદોલનને લઈને રિક્ષા એસોસિએશનો અને ગુજરાત ઓટો રિક્ષા ફેડરેશન વચ્ચે શરૂઆતથી જ તીવ્ર મતભેદો બહાર આવ્યા છે, જેમાં ફેડરેશને હડતાળમાં જોડાવાનો સ્પષ્ટ વિરોધ નોંધાવ્યો છે; ફેડરેશને તર્ક આપ્યો છે કે તાજેતરમાં જ સરકારે ઓટો રિક્ષાના ભાડામાં વધારો કર્યો છે જેથી ચાલકોને રાહત મળી છે, અને ટેક્સી કંપનીઓ સાથેના વિવાદો તે કંપનીઓએ જાતે જ ઉકેલવા જોઈએ અને આ હડતાળ સાથે રિક્ષાચાલકોને કોઈ સીધો સંબંધ નથી.

આંતરિક વિરોધાભાસ અને હડતાળની અનિશ્ચિતતા વચ્ચે જીએમડીસી ગ્રાઉન્ડ પર યોજાનારી આ બેઠક પર સમગ્ર રાજ્યના નાગરિકો અને પરિવહન તંત્રની મીંડેલી છે, કારણ કે આ બેઠકમાં લેવાનાર આખરી નિર્ણય આગામી ચાર દિવસ સુધી શહેરના વાહનવ્યવહાર અને સામાન્ય જનજીવન પર સીધી અસર પાડશે.