ગુજરાત કોંગ્રેસમાં લાંબા સમયથી ચાલી આવતો આંતરિક જૂથવાદ ફરી એકવાર સપાટી પર આવ્યો છે. ભાવનગર જિલ્લાના સિહોર ખાતે શહેર કોંગ્રેસ સમિતિમાં મોટો ભડકો થયો છે. સિહોર શહેર કોંગ્રેસના મહામંત્રી સુરેશભાઈ ચૌહાણે  પોતાના પદ પરથી અચાનક રાજીનામું આપી દેતા સ્થાનિક રાજકારણમાં ગરમાવો આવી ગયો છે. પક્ષના જ હોદ્દેદારો અને નેતાઓ સામે ગંભીર આક્ષેપો સાથેનું આ રાજીનામું કોંગ્રેસ માટે મોટો ઝટકો માનવામાં આવી રહ્યો છે.

મળતી વિગતો મુજબ, સિહોર નગરપાલિકા વિસ્તારના વોર્ડ નંબર 5 માં સ્થાનિક રહીશોના લાંબા સમયથી અટકેલા કામો અને જનતાની સમસ્યાઓને લઈને મહામંત્રી સુરેશભાઈ ચૌહાણે નગરપાલિકા સામે ઉપવાસ આંદોલન શરૂ કર્યું હતું. લોકપ્રશ્નો માટે લડત ચલાવી રહેલા સુરેશભાઈએ આ આંદોલન દરમિયાન ભાવનગર જિલ્લા કોંગ્રેસ તેમજ તાલુકા કોંગ્રેસના શીર્ષ નેતાઓને લેખિત અને મૌખિક જાણ કરી હતી. જોકે, અત્યંત આશ્ચર્યજનક અને આઘાતજનક બાબત એ રહી કે, પોતાની જ પાર્ટીના નેતાઓએ આ આંદોલન દરમિયાન તેમને કોઈ પણ પ્રકારની મદદ કે સહકાર આપ્યો ન હતો. પક્ષ તરફથી આ પ્રકારની ઉપેક્ષા અને નકારાત્મક વલણ મળતા તેઓ ભારે નારાજ થયા હતા.

પોતાના પદ પરથી રાજીનામું આપ્યા બાદ સુરેશભાઈ ચૌહાણે એક વિશેષ વિડીયોને સોશિયલ મીડિયા પર વાઈરલ કર્યો છે. આ વિડીયોમાં તેમણે પક્ષના સ્થાનિક નેતાઓ પ્રત્યે પોતાનો રોષ અને આક્રોશ ઠાલવ્યો છે. તેમણે સ્પષ્ટ કર્યું છે કે જનતાના કામો માટે લડતા કાર્યકરને જો પક્ષ જ સાથ ન આપતો હોય, તો આવા પદ પર રહેવાનો કોઈ અર્થ નથી. આ વાઈરલ વિડીયોના કારણે સિહોર અને ભાવનગર કોંગ્રેસમાં ચાલતી જૂથબંધી અને આંતરિક ખેંચતાણ જગજાહેર થઈ ગઈ છે. હાલમાં આ મુદ્દો સમગ્ર જિલ્લાના રાજકીય વર્તુળોમાં ભારે ચર્ચાનો વિષય બન્યો છે.