અશ્વિન વ્યાસ દ્વારા, ગાંધીનગર : રાષ્ટ્રપિતા મહાત્મા ગાંધીજીની જન્મજયંતી નિમિત્તે સ્વચ્છતાનો સંદેશ જન-જન સુધી પહોંચાડવાના હેતુથી મુખ્યમંત્રી ભુપેન્દ્રભાઈ પટેલના નેતૃત્વ હેઠળ ગુજરાત સરકાર દ્વારા ‘સ્વચ્છતા હી સેવા-૨૦૨૬’ અભિયાનનું આયોજન કરવામાં આવ્યું છે. ‘સ્વચ્છતામાં સહભાગ, સ્વચ્છ ભારત, વિકસિત ભારત’ની મુખ્ય વિષયવસ્તુ સાથે શરૂ થયેલા આ અભિયાનનો મુખ્ય ઉદ્દેશ સરકારી કચેરીઓમાં સ્વચ્છતા જાળવવાની સાથે વર્ષોથી પડતર જૂની દસ્તાવેજી ફાઈલો, નોંધણી રેકોર્ડ, બિનઉપયોગી સામાન, ભંગાર અને વિજાણુ કચરા (ઈ-વેસ્ટ)નો યોગ્ય નિકાલ કરી કચેરીઓને સ્વચ્છ, સુવ્યવસ્થિત અને કાર્યક્ષમ બનાવવાનો છે. મુખ્યમંત્રીના સીધા નેતૃત્વ હેઠળના સામાન્ય વહીવટ વિભાગના ઠરાવ મુજબ રાજ્ય સરકારે શ્રેષ્ઠ કામગીરી કરનારી સરકારી કચેરીઓને પ્રોત્સાહિત કરવા માટે સન્માનિત કરવાનું આયોજન કર્યું છે.

૧૭ ઓક્ટોબર સુધી ચાલશે વિશેષ સ્વચ્છતા ઝુંબેશ:
ગત ૧૭ સપ્ટેમ્બરથી શરૂ થયેલું અને આગામી ૧૭ ઓક્ટોબર, ૨૦૨૬ સુધી ચાલનાર આ અભિયાન અંતર્ગત સરકારી કચેરીઓમાં પડતર અરજીઓ અને કાગળોનો અગ્રતાક્રમે નિકાલ, નોંધણી રેકોર્ડનું વર્ગીકરણ અને બિનઉપયોગી વસ્તુઓ દૂર કરીને કામગીરી માટે વધુ જગ્યા ઉપલબ્ધ કરાવવા પર ખાસ ભાર મૂકવામાં આવ્યો છે.

૧૦૦ ગુણના આધારે થશે કચેરીઓનું ગુણવત્તા મૂલ્યાંકન:
અભિયાન હેઠળ સરકારી કચેરીઓની કામગીરીનું ૧૦૦ ગુણના આધારે મૂલ્યાંકન કરવામાં આવશે. જેમાં પડતર કાગળોના નિકાલ માટે ૨૦ ટકા, નોંધણી રેકોર્ડના વર્ગીકરણ માટે ૩૦ ટકા અને ભંગાર, વિજાણુ કચરા તથા બિનઉપયોગી વસ્તુઓના નિકાલ સાથે કચેરીની સફાઈ માટે પચાસ ટકા ગુણભાર નક્કી કરવામાં આવ્યો છે.

ત્રણ શ્રેણીમાં પસંદગી અને સુશાસન દિવસે સન્માન:
સચિવાલયના વિભાગો, ગાંધીનગર ખાતે આવેલી ખાતાના વડાની કચેરીઓ તેમજ કલેક્ટર અને મામલતદારની અધ્યક્ષતામાં ચાલતી જિલ્લા અને તાલુકા કક્ષાની કચેરીઓને ઉત્કૃષ્ટ (Best), ઊભરતી (Emerging) અને આશાસ્પદ (Aspiring) એમ ત્રણ શ્રેણીમાં વિભાજિત કરીને મૂલ્યાંકન કરવામાં આવશે. કચેરીઓએ ૩૦ જૂન, ૨૦૨૬ની સ્થિતિને આધાર બનાવી અભિયાન દરમિયાન થયેલા સુધારા, જગ્યાની બચત, ભંગારની આવક અને ૧૭ ઓક્ટોબર, ૨૦૨૬ની સ્થિતિના આંકડા તથા છબીઓ (ફોટોગ્રાફ્સ) સાથેનો અહેવાલ ૩૧ ઓક્ટોબર, ૨૦૨૬ સુધીમાં રજૂ કરવાનો રહેશે. ઉચ્ચ સ્તરીય સમિતિની આખરી પસંદગી બાદ પસંદ થયેલી કચેરીઓને ૨૫ ડિસેમ્બર, ૨૦૨૬ના ‘સુશાસન દિવસ’ નિમિત્તે પ્રમાણપત્ર એનાયત કરવામાં આવશે.