અમદાવાદ : અમદાવાદ શહેરમાં નવા વર્ષના પવિત્ર અને ઉત્સવના દિવસે જ પૂર્વ વિસ્તારમાં મારામારી અને હુમલાની ત્રણ અલગ-અલગ ઘટનાઓ સામે આવતા કાયદો અને વ્યવસ્થા સામે ગંભીર સવાલો ઉભા થયા છે.

પ્રાપ્ત વિગતો અનુસાર, નવા વર્ષની ઉજવણીના માહોલ વચ્ચે ખોખરામાં ઉધાર કપડાં આપવાની ના પાડવા બાબતે, અમરાઈવાડીમાં ગુટકાના પૈસા ન આપવા બાબતે અને ગોમતીપુરમાં બાળકોને રમવા દેવા જેવી નજીવી બાબતે લોહીયાળ ઝઘડા થયા હતા.

પ્રથમ ઘટનામાં ખોખરાના ભાઈપુરા વિસ્તારમાં આવેલા કપડાના વેપારી દિલીપભાઈ સરોજની દુકાને આવેલા બે શખ્સોએ પૈસા આપ્યા વિના ટી-શર્ટ લઈને જવાનો પ્રયાસ કર્યો હતો, અને વેપારીએ ઉધાર આપવાની ના પાડતા તેમને લાફા મારી જાનથી મારી નાખવાની ધમકી આપી ફરાર થઈ ગયા હતા.

બીજી ઘટના અમરાઈવાડી વિસ્તારના શ્રીનાથ નગર ખાતે બની હતી, જ્યાં પાનના ગલ્લા પર સન્ની જયસ્વાલ નામના શખ્સે ગુટકા ખાવાના પૈસા માંગતા અને સેવકકુમારે પૈસા આપવાની ના પાડતા ઉશ્કેરાઈને છરી વડે માથાના ભાગે જીવલેણ હુમલો કર્યો હતો.

ત્રીજી ઘટના ગોમતીપુર વિસ્તારમાં સામે આવી હતી, જ્યાં બાળકોને ઝઘડો કરવાથી અટકાવવા ગયેલા મોહમ્મદ હુસેન શેખ સાથે બોલાચાલી કરીને આરોપી ઘરેથી તલવાર લાવીને હુમલો કરતા તેના હાથના પંજા પર ગંભીર ઈજા પહોંચી હતી.

આ તમામ બનાવ અંગે સ્થાનિક પોલીસ સ્ટેશનોમાં ગુના નોંધવામાં આવ્યા છે, અને ઈજાગ્રસ્તોને ત્વરિત સારવાર અર્થે હોસ્પિટલ ખસેડવામાં આવ્યા બાદ પોલીસે નાસી છૂટેલા તમામ આરોપીઓને ઝડપી પાડવા માટે ચક્રો ગતિમાન કર્યા છે.