વલસાડ, તા.૨૨ જુલાઈ: ગુજરાતમાં પશ્ચિમ રેલવેના વલસાડ ડિવિઝન હેઠળ આવતા ઉદવાડા (UVD) અને પારડી (PAD) રેલવે સ્ટેશનો વચ્ચે બુધવારે અચાનક બેંક સ્લાઇડિંગ (રેલવે ટ્રેક નજીકની માટી ધસી પડવાની) ગંભીર ઘટના બનતા રેલવે વાહનવ્યવહાર પર ભારે અસર પડી છે. ટ્રેક સુરક્ષા અને મરંમતની કામગીરીના ભાગરૂપે પશ્ચિમ રેલવે તંત્ર દ્વારા ત્વરિત પગલાં ભરીને ૧૫ જેટલી પ્રીમિયમ અને પેસેન્જર ટ્રેનોના શિડ્યુલમાં મોટા ફેરફારો કરવામાં આવ્યા છે. જેમાં એક મેમુ ટ્રેન સંપૂર્ણપણે રદ કરવામાં આવી છે, જ્યારે કેટલીક મહત્વપૂર્ણ ટ્રેનોને તેમના નિર્ધારિત લક્ષ્ય સુધી પહોંચાડવાના બદલે વચ્ચેના સ્ટેશનો પર જ શોર્ટ-ટર્મિનેટ (ટૂંકાવી) કરી દેવામાં આવી છે. આ ઉપરાંત કેટલીક ટ્રેનોને મૂળ સ્ટેશનના બદલે બદલાયેલા મધ્યવર્તી સ્ટેશનોથી રવાના (શોર્ટ-ઓરિજિનેટ) કરવાનો નિર્ણય લેવામાં આવ્યો છે.

રેલવે તંત્ર દ્વારા આપાતકાલીન ધોરણે જાહેર કરવામાં આવેલી સત્તાવાર માહિતી મુજબ, તા. ૨૨ જુલાઈ ૨૦૨૬ના રોજ ઉદવાડા અને પારડી વચ્ચે માટી ખસી જવાની ઘટનાના કારણે રૂટ નંબર ૬૯૧૫૩ ઉંમરગામ રોડ–વલસાડ મેમુ ટ્રેનને સંપૂર્ણપણે રદ કરવામાં આવી છે. આ ઉપરાંત ૮ જેટલી ટ્રેનોને તેમના મૂળ ગંતવ્ય સ્થાન સુધી પહોંચાડવાને બદલે શોર્ટ-ટર્મિનેટ કરવામાં આવી છે. જેમાં તા. ૨૨ જુલાઈની ટ્રેન નંબર ૬૯૧૫૪ વલસાડ-ઉંમરગામ રોડ ટ્રેન વલસાડ ખાતે, ટ્રેન નંબર ૬૯૧૩૯ બોરીવલી-વલસાડ ટ્રેન વાપી ખાતે, ટ્રેન નંબર ૧૨૯૩૪ અમદાવાદ-બાંદ્રા ટર્મિનસ કર્ણાવતી એક્સપ્રેસ વલસાડ ખાતે, ટ્રેન નંબર ૧૨૯૩૨ અમદાવાદ-મુંબઈ સેન્ટ્રલ ટ્રેન નવસારી ખાતે, ટ્રેન નંબર ૨૨૯૩૦ વડોદરા-દહાણુ રોડ ટ્રેન બીલીમોરા ખાતે, અને ટ્રેન નંબર ૫૯૦૪૫ મુંબઈ સેન્ટ્રલ-વાપી પેસેન્જર ટ્રેન ઘોલવડ ખાતે ટૂંકાવવામાં આવી છે. જ્યારે અગાઉની તારીખે ઉપડેલી ટ્રેનો પૈકી તા. ૨૧ જુલાઈની ટ્રેન નંબર ૨૦૯૦૮ ભુજ-દાદર સયાજીનગરી એક્સપ્રેસ સુરત ખાતે અને ટ્રેન નંબર ૧૨૯૯૬ અજમેર-બાંદ્રા ટર્મિનસ સુપરફાસ્ટ ટ્રેન વલસાડ ખાતે જ શોર્ટ-ટર્મિનેટ કરાઈ છે.

બીજી તરફ, અપ-ડાઉન કરતા હજારો મુસાફરોની સુવિધા અને ટ્રેન વ્યવહારને પુનઃ પાટા પર લાવવાના હેતુથી ૬ જેટલી પ્રમુખ ટ્રેનોના પ્રારંભિક સ્ટેશનો બદલીને તેમને શોર્ટ-ઓરિજિનેટ (રીવર્સ) કરવામાં આવી છે. જેમાં તા. ૨૨ જુલાઈની ટ્રેન નંબર ૧૨૯૩૩ બાંદ્રા ટર્મિનસ-અમદાવાદ કર્ણાવતી એક્સપ્રેસ બાંદ્રાના બદલે વલસાડથી સાંજે ૧૬:૨૦ વાગ્યે ઊપડશે અને બાંદ્રા-વલસાડ વચ્ચે રદ રહેશે. ટ્રેન નંબર ૧૨૯૩૧ મુંબઈ સેન્ટ્રલ-અમદાવાદ ડબલ ડેકર એક્સપ્રેસ નવસારીથી સાંજે ૧૭:૨૦ વાગ્યે ઉપડશે અને મુંબઈ સેન્ટ્રલથી નવસારી વચ્ચે રદ રહેશે.

આ જ રીતે, ટ્રેન નંબર ૨૨૯૨૯ દહાણુ રોડ-વડોદરા ટ્રેન બીલીમોરાથી સાંજે ૧૭:૨૦ વાગ્યે ઉપડશે (દહાણુ રોડ-બીલીમોરા વચ્ચે રદ), ટ્રેન નંબર ૫૯૦૪૦ વાપી-મુંબઈ સેન્ટ્રલ ટ્રેન ઘોલવડથી બપોરે ૧૪:૩૮ વાગ્યે ઉપડશે (વાપી-ઘોલવડ વચ્ચે રદ), ટ્રેન નંબર ૨૦૯૦૭ દાદર-ભુજ સયાજીનગરી એક્સપ્રેસ સુરતથી સાંજે ૧૯:૩૫ વાગ્યે ઉપડશે (દાદર-સુરત વચ્ચે રદ) તેમજ ટ્રેન નંબર ૧૨૯૯૫ બાંદ્રા ટર્મિનસ-અજમેર સુપરફાસ્ટ ટ્રેન બાંદ્રાને બદલે વલસાડથી રાત્રે ૨૦:૧૫ વાગ્યે ઉપડશે અને બાંદ્રા-વલસાડ વચ્ચે રદ રહેશે. રેલવેના ટેકનિકલ વિભાગ દ્વારા માટી હટાવીને ટ્રેકનું સમારકામ ઝડપથી પૂર્ણ કરવા માટે યુદ્ધના ધોરણે કામગીરી હાથ ધરવામાં આવી છે.