અમેરિકામાં ગાજરને કારણે ફેલાયો જીવલેણ વાયરસ : એકનું મોત
ગાજરને કારણે ફેલાયેલા વાયરસથી અમેરિકનોમાં ફફડાટ : ઓર્ગેનિક કેરટ્સ એટલે કે ઓર્ગેનિક ગાજર સાથે જોડાયેલા ઈ.કોલીના કારણે એક વ્યક્તિનું મોત થયું છે
કેલિફોર્નિયા, તા.૧૯: અમેરિકામાં હાલમાં ઈ.કોલી ઈન્ફેક્શનથી ફફડાટ ફેલાયો છે અને ફેડરલ રેગ્યુલેટર્સે રવિવારે જણાવ્યું હતું કે ઓર્ગેનિક કેરટ્સ એટલે કે ઓર્ગેનિક ગાજર સાથે જોડાયેલા ઈ.કોલીના કારણે એક વ્યક્તિનું મોત થયું છે અને ૩૯ લોકો બીમાર પડ્યા છે. યુએસ સેન્ટર્સ ફોર ડિસીઝ કંટ્રોલ એન્ડ પ્રિવેન્શને જણાવ્યું હતું કે, ગ્રીમવે ફાર્મ્સ દ્વારા વેચવામાં આવેલા ઓર્ગેનિક કેરટ્સ અને બેબી કેરટ્સની બહુવિધ બ્રાન્ડ્સ સાથે ઈન્ફેક્શન જોડાયેલો હતો. એજન્સીના જણાવ્યા પ્રમાણે પંદર લોકોને હોસ્પિટલમાં દાખલ કરવામાં આવ્યા છે. હાલમાં સ્ટોરમાં ઉપલબ્ધ ગાજરને રિકોલ કરવાથી કોઈ ફરક પડવાની શકયતા નથી પરંતુ ગ્રાહકોના રેફ્રિજરેટર્સ અથવા ફ્રીઝરમાં હોય તેવા ગાજરના કારણે ઈન્ફેક્શન થઈ શકે છે. CDCના અધિકારીએ જણાવ્યું હતું કે, જો તમારી પાસે રિકોલ કરવામાં આવેલા ગાજર હોય તો તેને ફેંકી દેજો અથવા તો સ્ટોરમાં પાછા આપી દેજો.
કેલિફોર્નિયાના બેકર્સફિલ્ડ સ્થિત ગ્રીમવે ફાર્મ્સએ શનિવારે એક નિવેદનમાં જણાવ્યું હતું કે તેણે તેના બેગ્ડ ઓર્ગેનિક કેરટ્સ અને બેબી કેરટ્સને રિકોલ કર્યા છે. રિકોલ કરવામાં આવેલા આવેલા ઉત્પાદનોમાં ઓર્ગેનિક હોલ કેરટ્સનો સમાવેશ થાય છે. તેની બેગ પર તેની એક્સપાયરી ડેટ લખવામાં નહતી આવી પરંતુ ૧૪ ઓગસ્ટથી ૨૩ ઓક્ટોબર ૨૦૨૪ સુધી રિટેલ સ્ટોર્સ પર તે ગાજર ખરીદી માટે ઉપલબ્ધ હતા. રિકોલમાં ઓર્ગેનિક બેબી કેરટ્સ પણ સામેલ હતા જેના ઉપયોગ માટેની શ્રેષ્ઠ તારીખ સપ્ટેમ્બર ૧૧થી નવેમ્બર ૧૨ ૨૦૨૪ સુધીની હતી. આ ગાજર વિવિધ નામની બ્રાન્ડ સાથે ઘણા બધા રિટેલર્સ પર વેચવામાં આવ્યા હતા. ફૂડ એન્ડ ડ્રગ એડમિનિસ્ટ્રેશનના જણાવ્યા પ્રમાણે આ ગાજરના ચેપની સૌથી વધુ અસર મિનેસોટા, ન્યૂયોર્ક અને વોશિંગ્ટન જેવા રાજ્યોને થઈ છે.
સામાન્ય રીતે જે વ્યક્તિ ઈ.કોલીનો ચેપ લાગેલી વસ્તુ ખાય તેના ચાર દિવસ બાદ તેની અસર જોવા મળતી હોય છે. તેના લક્ષણોમાં પેટમાં દુઃખાવો અને ડાયેરિયા સામેલ છે. જો કોઈ વ્યક્તિ બે દિવસથી વધુ સમય સુધી આવી તકલીફ અનુભવે અથવા તો તેને ૧૦૨ ડિગ્રીથી વધારેનો તાવ આવે અથવા ડીહાઈડ્રેશનનો અનુભવ કરે તો તેના તાત્કાલિક સારવારની જરૂર પડે છે. ઘણા લોકોને તેનાથી કિડનીની ગંભીર સમસ્યાનો પણ સામનો કરવો પડતો હોય છે અને તેને હોસ્પિટલમાં ભરતી કરવાની જરૂર પડે છે. CDCનું કહેવું છે કે ઈ.કોલીનો ચેપ લાગ્યા બાદ મોટા ભાગના લોકો કોઈ પણ જાતની સારવાર વગર જ પાંચથી સાત દિવસમાં સાજા થઈ જતાં હોય છે.
CDC અનુસાર ઈ.કોલી ગત મહિને મેકડોનાલ્ડ્સના ક્વાર્ટર પાઉન્ડ હેમબર્ગરમાંથી આવ્યો હતો અને ત્યારબાદ ગાજરમાંથી આવેલા ઈ.કોલીના કારણે એક વ્યક્તિનું મોત થયું છે અને ૧૦૦થી વધુ લોકોને તેનો ચેપ લાગ્યો છે. ઉલ્લેખનીય છે કે ઈ.કોલીના કારણે મેકડોનાલ્ડ્સને ઘણું નુકસાન ઉઠાવવું પડ્યું છે. મેકડોનાલ્ડ્સે કહ્યું હતું કે, ઈ.કોલીના ચેપના કારણે તેની જે પણ ફ્રેન્ચાઈઝીઓને સૌથી વધુ અસર થઈ છે તેને રિકવર કરવા માટે તે ૧૦૦ મિલિયન ડોલરનું રોકાણ કરશે. કંપનીએ કહ્યું હતું કે, જે ફ્રેન્ચાઈઝીઓને બિઝનેસમાં નુકસાન ગયું છે તેમના સપોર્ટ માટે ૬૫ મિલિયન ડોલરનું રોકાણ કરવામાં આવશે. આ ઉપરાંત જે રાજ્યોમાં સૌથી વધુ અશર થઈ છે તેને ટાર્ગેટ કરવામાં આવશે.
(10:40 AM IST)
છેલ્લા 8 દિવસમાં સૌથી લોકપ્રિય 
