નવી દિલ્હી: ભારત દેશ એક તરફ પ્રજાસત્તાક દિવસની ઉજવણી કરવાની તૈયારી કરી રહ્યું છે ત્યારે બીજી બાજુ ચીને વાસ્તવિક નિયંત્રણ રેખા (LAC) નજીક કોમ્બેટ ડ્રિલ શરુ કરી દેતાં ખળભળાટ મચી ગયો છે. ચીનના સૈન્ય પીપલ્સ લિબરેશન આર્મી(PLA)ની શિનજિયાંગ મિલિટ્રી કમાન્ડના રેઝિમેન્ટની આગેવાનીમાં આ યુદ્ધાભ્યાસ કરાયો હતો. ચીનની કોમ્બેટ ડ્રિલમાં તમામ વિસ્તારોમાં વાપરી શકાય તેવા વાહનો, માનવરહિત સિસ્ટમ અને ડ્રોન સહિત સૈન્યની અપગ્રેડેડ ટૅક્નોલૉજીનો ઉપયોગ કરાયો હતો. ચીન તરફથી આ કાર્યવાહી એવા સમયે કરાઈ છે જ્યારે ભારત અને ચીન વચ્ચે પહેલાંથી જ શાંતિ મંત્રણા ચાલી રહી છે. ભારત અને ચીન વચ્ચે LAC પર સૈનિકો પાછા બોલાવી લેવા અને ફરી પેટ્રોલિંગ શરુ કરવા અંગે 21 ઑક્ટોબર 2024ના રોજ એક કરાર થયો હતો. આ કરાર 2020માં ગલવાન ખીણમાં સર્જાયેલી અથડામણ બાદ બંને વચ્ચે વધી ગયેલા તણાવને ઘટાડવાની દિશામાં મોટું પગલું માનવામાં આવી રહ્યું હતું.