ન્‍યુયોર્ક, તા.૧: દુનિયાભરના લોકો વિવિધ અનોખા રેકોર્ડ બનાવે છે. કેટલાક પાણીમાં લાંબા સમય સુધી શ્વાસ રોકીને રેકોર્ડ બનાવે છે, જ્‍યારે કેટલાક લાંબા નખ ઉગાડીને રેકોર્ડ બનાવે છે. આ જ ક્રમમાં, કેલિફોર્નિયાની એક મહિલાએ તેની ૯.૭૫ સેમી (૩.૮ ઇંચ) લાંબી જીભ સાથે ગિનિસ વર્લ્‍ડ રેકોર્ડ બનાવ્‍યો છે, જે આઇફોન જેટલી લાંબી છે. કેલિફોર્નિયાની વિદ્યાર્થીની ચેનલ ટેપરના નામે મહિલાઓમાં સૌથી લાંબી જીભ હોવાનો રેકોર્ડ છે. તેની જીભની લંબાઈ ૩.૮ ઇંચ (૯.૭૫ સે.મી.) છે. આ અનોખી રચનાને કારણે, તેમણે ગિનિસ વર્લ્‍ડ રેકોર્ડમાં પોતાનું નામ નોંધાવ્‍યું છે. ટેપરે કહ્યું કે તેને પહેલી વાર ૮ વર્ષની ઉંમરે તેની લાંબી જીભનો ખ્‍યાલ આવ્‍યો. આ ત્‍યારે બન્‍યું જ્‍યારે તે તેની માતા સાથે હેલોવીન ફોટો સેશન કરી રહી હતી. તે ક્ષણને યાદ કરતાં, ટેપરે કહ્યું, જ્‍યારે હેલોવીન ચિત્ર પ્રકાશિત થયું, ત્‍યારે મેં જોયું કે મારી જીભ અસામાન્‍ય રીતે લાંબી હતી.

ટેપરને તેની લાંબી જીભને કારણે મળતી રમુજી અને આશ્‍ચર્યજનક પ્રતિક્રિયાઓ ખૂબ ગમે છે. તેમણે કહ્યું, જ્‍યારે લોકો મારી જીભ જોઈને આશ્‍ચર્યચકિત થાય છે ત્‍યારે મને ખૂબ સારું લાગે છે. કયારેક, કેટલાક લોકો ડરથી ચીસો પણ પાડે છે.

તેમની રેકોર્ડબ્રેક જીભે ઇન્‍ટરનેટ પર ધૂમ મચાવી દીધી છે. ગિનિસ વર્લ્‍ડ રેકોર્ડ્‍સે તેનો વીડિયો ઇન્‍સ્‍ટાગ્રામ પર શેર કર્યો, જેના પછી તે વધુ વાયરલ થઈ ગઈ.

ગિનિસ બુક ઓફ વર્લ્‍ડ રેકોર્ડ્‍સ અનુસાર, અમેરિકાના નિક સ્‍ટોબર્લ સૌથી લાંબી જીભ (પુરુષ) ધરાવવાનો રેકોર્ડ ધરાવે છે. તેની જીભની લંબાઈ ૧૦.૧ સેમી (૩.૯૭ ઇંચ) છે. રેકોર્ડ મુજબ, નિકની જીભ એટલી લાંબી છે કે તે તેની કોણી ચાટી શકે છે.