મોસ્‍કો, તા.૧૨: સાઇબિરીયાનું યાકુત્‍સ્‍ક દુનિયાનું સૌથી ઠંડું શહેર છે. આ શહેર તેની અનોખી જીવનશૈલીના કારણે ચર્ચામાં રહે છે. શિયાળામાં અહીંનું તાપમાન -૬૦ ડિગ્રી સેલ્‍સિયસ સુધી ઘટી જાય છે અને કયારેક -૬૪.૪ ડિગ્રી સુધી પહોંચી ગયું છે, જેમ કે ૫ ફેબ્રુઆરી ૧૮૯૧ના રોજ નોંધાયું હતું. આ ઠંડીમાં આખું શહેર કુદરતી ફ્રીઝર બની જાય છે, જ્‍યાં ખુલ્લા બજારોમાં માલ બગડવાનો કોઈ સવાલ જ નથી. માછલી બજારોમાં કોઈ ગંધ નથી કારણ કે બધું જ થીજી ગયું છે. અહીંની વસ્‍તીના લોકો માંસ-મચ્‍છી પર આધાર રાખે છે. જેમાં સસલું, રેન્‍ડીયર, માછલી સામેલ છે.

સૌથી નવાઈની વાત એ છે કે, અહીંની પ્રિય વાનગી કાચા ઘોડાનું લીવર છે! સોશિયલ મીડિયા પર વાયરલ થયેલા એક વીડિયોએ યાકુત્‍સ્‍કની આ અનોખી જીવનશૌલીને દુનિયા સમક્ષ રજૂ કરી છે. યાકુત્‍સ્‍કની વસ્‍તી લગભગ ૩,૫૫,૪૪૩ (૨૦૨૧ ની વસ્‍તી ગણતરી) છે, જે તેને વિશ્વનું સૌથી ઠંડુ મોટું શહેર બનાવે છે.

જાન્‍યુઆરીમાં સરેરાશ તાપમાન -42°C (-43.6°F) હોય છે અને દિવસમાં માત્ર ચાર કલાક સૂર્યપ્રકાશ મળે છે. શહેર સંપૂર્ણપણે પર્માફ્રોસ્‍ટ પર બનેલું છે, મોટાભાગની ઇમારતો કોંક્રિટના થાંભલાઓ પર ઉભી છે જેથી ગરમીથી પર્માફ્રોસ્‍ટ પીગળી ન જાય.

રહેવાસીઓ પાસે ઠંડીનો સામનો કરવાની અનોખી રીતો છે. લોકો સસલા, શિયાળ અથવા રેન્‍ડીયરની ચામડીમાંથી બનેલા કોટ અને બૂટ જેવા સ્‍તરો પહેરે છે. એક સ્‍થાનિક રહેવાસી, નુરગુસુન સ્‍ટારોસ્‍ટીનાએ રોઇટર્સને જણાવ્‍યું કે, ફક્‍ત ગરમ વષાો પહેરો, કોબીના સ્‍તરોની જેમ! શેરીઓ બરફના ધુમ્‍મસથી ઢંકાયેલી હોય છે, જે એટલી ઠંડી હોય છે કે ગરમ હવા ઉપર આવી શકતી નથી.

લોકો બહાર થોડો સમય વિતાવે છે કારણ કે ૧૦ મિનિટથી વધુ સમય સુધી ઠંડીમાં રહેવાથી થીજી જવાનું જોખમ રહે છે. યાકુત્‍સ્‍કના ખુલ્લા બજારો આ શહેરની સૌથી અનોખી વિશેષતા છે. અહીં ખુલ્લામાં માછલી અને માંસ વેચાય છે કારણ કે -૬૦ ડિગ્રી ઠંડીમાં કંઈ બગડતું નથી.

માછલી બજારોમાં કોઈ ગંધ નથી કારણ કે બધું જ થીજી ગયું છે. વાયરલ પોસ્‍ટમાં ટ્રાવેલ વ્‍લોગર અંકિતા કુમારે કહ્યું કે તેણે એક મોટી માછલી ઉપાડી પણ તેમાંથી કોઈ ગંધ આવી નહીં. અહીંના લોકો મુખ્‍યત્‍વે માંસ ખાય છે કારણ કે ઠંડીને કારણે પાક ઉગાડવાનું અશકય છે. કાચું અને થીજેલું માંસ, જેમ કે ઘોડો, રેન્‍ડીયર, સસલું અને માછલી, તેમના આહારનો મુખ્‍ય ભાગ છે