નવી દિલ્હીઃ: સ્માર્ટફોન અને સોશિયલ મીડિયાના દૂષણથી નાની વયના બાળકોનું બાળપણ અને માનસિક વિકાસ રોળાઈ રહ્યો છે ત્યારે આંતરરાષ્ટ્રીય સ્તરેથી એક ખૂબ જ ચોંકાવનારા અને ઐતિહાસિક સમાચાર સામે આવ્યા છે! ન્યૂઝીલેન્ડ સરકારે ૧૬ વર્ષથી નાની વયના બાળકો માટે સોશિયલ મીડિયાના ઉપયોગ પર સંપૂર્ણપણે પ્રતિબંધ મૂકવાની કડક તૈયારીઓ કરી લીધી છે. આ અંગે દેશની સંસદમાં એક વિશેષ વિધેયક (બિલ) પણ રજૂ કરી દેવામાં આવ્યું છે!
ન્યુઝીલેન્ડના પ્રધાનમંત્રી ક્રિસ્ટોફર લક્ષનએ જણાવ્યું હતું કે, 'અમે દેશના બાળકોની આખી પેઢીને થઈ રહેલું નુકસાન સહન કરી શકીએ નહીં. 13થી 17 વર્ષનું દર ત્રીજું બાળક રોજનો ઓછામાં ઓછો 5 કલાકનો સમય સોશિયલ મીડિયા પર વિતાવે છે, જેનાથી તેમનું કૌટુંબિક જીવન, અભ્યાસ અને ઊંઘ પ્રભાવિત થઈ રહ્યા છે.'
આ બિલને કાયદાનું સ્વરૂપ આપવા માટે રાજકીય પડકારોનો સામનો કરવો પડી રહ્યો છે. પ્રધાનમંત્રી લક્ષનની ગઠબંધન સરકારના બે મુખ્ય સહયોગી પક્ષો—'એક્ટ' (ACT) પાર્ટી અને 'ન્યુઝીલેન્ડ ફર્સ્ટ' (NZ First)—આ બિલનો વિરોધ કરી રહ્યા છે. ન્યુઝીલેન્ડ ફર્સ્ટનું માનવું છે કે બાળકોને સોશિયલ મીડિયાથી દૂર રાખવાની જવાબદારી વાલીઓની છે. બીજી તરફ, મુખ્ય વિપક્ષી દળ લેબર પાર્ટીએ વેરિફિકેશન અને પ્રાઈવસી સંબંધિત સવાલો ઉઠાવ્યા છે અને હજુ સુધી પોતાનું અંતિમ સમર્થન જાહેર કર્યું નથી.
ઓસ્ટ્રેલિયા 16 વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકનારો વિશ્વનો પહેલો દેશ બન્યો હતો. હવે ફ્રાન્સ, યુકે, ઈન્ડોનેશિયા, મલેશિયા, બ્રાઝિલ અને યુએઈ (UAE) સહિતના દેશોએ પણ આવા કાયદા પસાર કર્યા છે અથવા પ્રસ્તાવો આગળ વધાર્યા છે.