નવી દિલ્હી: પૃથ્વી પર માનવી સિવાય પણ કેવા પ્રચંડ જીવો અસ્તિત્વ ધરાવે છે તેનું ઉદાહરણ ઓસ્ટ્રેલિયાના દક્ષિણી દરિયાકાંઠે જોવા મળ્યું છે. સ્થાનિક વન્યજીવ સત્તાવાળાઓને દરિયા કિનારે આરામ કરતું એક વિશાળ સધર્ન એલિફન્ટ સીલ મળી આવ્યું છે, જેનું વજન કાઢતા તે પૂરા ૧૦૦૦ કિલોનું હોવાનું માલૂમ પડ્યું હતું. સામાન્ય રીતે સીલ નાહના અને હળવા હોય છે, પરંતુ આ ખાસ પ્રજાતિ પૃથ્વી પરના સૌથી મોટા દરિયાઈ સસ્તન શિકારી જીવોમાંની એક છે.

વાઇલ્ડલાઇફ નિષ્ણાતોના જણાવ્યા અનુસાર, નીલની ઉંમર હાલમાં આશરે 5 વર્ષની છે અને તેનું વજન 1000 કિલોગ્રામ સુધી પહોંચી ગયું છે. સમુદ્રમાં મહિનાઓ સુધી ખોરાક લીધા પછી, તે વર્ષમાં 2 વખત આરામ કરવા અને તેની જૂની ત્વચા તેમજ વાળ ઉતારવા માટે તાસ્માનિયાના રહેણાંક વિસ્તારોના બીચ પર આવી પહોંચે છે. કદમાં એક નાની કાર જેટલો મોટો હોવાના કારણે તે જ્યાં પણ બેસી જાય છે, ત્યાં આખું ટ્રાફિક તંત્ર ઠપ્પ થઈ જાય છે.

સોશિયલ મીડિયા પ્લેટફોર્મ ટિકટોક પર નીલના 14 લાખથી વધુ ફોલોઅર્સ છે, જ્યારે ઇન્સ્ટાગ્રામ પર પણ તેના લાખો ચાહકો છે. તેની લોકપ્રિયતાનું મુખ્ય કારણ તેની તોફાની હરકતો છે. નીલ અવારનવાર રસ્તાની વચ્ચોવચ લાંબો થઈને સૂઈ જાય છે, જેના કારણે રસ્તાઓ બંધ કરવા પડે છે. તાજેતરમાં વાયરલ થયેલા વીડિયોમાં તે ફૂટપાથ પર લગાવેલા મજબૂત કોંક્રિટના બોલાર્ડ્સ (રસ્તાની બાજુના થાંભલા) તોડતો, ટ્રાફિક કોન સાથે રમતો, ઘરની ફેન્સ કચડી નાખતો અને પાર્ક કરેલી મોટી લેન્ડ ક્રુઝર ગાડીઓ સાથે અથડાઈને પોતાની તાકાતનું પ્રદર્શન કરતો જોવા મળ્યો છે.