ટોરેન્‍ટો,તા.૧૭: કેનેડામાં એક અમીર સમલૈંગિક કપલે તેમના સંતાનને જન્‍મ આપનારી સરોગેટ મધર પર પાંચ કરોડ રૂપિયાનો કેસ ઠોક્‍યો છે. કપલની નારાજગી એટલી જ હતી કે સરોગેટ મધરે બાવીસ અઠવાડિયાંના ગર્ભને પડાવી નાખવાની ના પાડી દીધી. આ ઘટના ૨૦૨૪ની છે. સરોગેટ મધરને પાંચમો મહિનો ચાલી રહ્યો હતો અને ડોક્‍ટરોએ રિપોર્ટમાં કહ્યું કે ગર્ભમાંના બાળકનો હોઠ થોડો કપાયેલો છે. બસ આટલી ખામીની વાત સાંભળીને કપલ ગભરાઈ ગયું અને તેમણે તરત જ સરોગેટ મધરને એ ગર્ભ પડાવી નાખવાનું કહ્યું. જોકે સરોગેટ મધરે આ માટે ધરાર ના પાડી દીધી. તેનું કહેવું હતું કે માત્ર ચહેરાની ખામી માટે થઈને અબોર્શન કરાવવા તે તૈયાર નથી, એ બાળકને પ્‍લાસ્‍ટિક સર્જરીથી પણ નોર્મલ લુક મળી જ શકે છે. જોકે ગભરાયેલા કપલે આ વાતને અલગ રીતે લીધી. તેમણે કોર્ટમાં કેસ કર્યો કે સરોગેટ મધર તેમના કોન્‍ટ્રેક્‍ટને ફોલો નથી કરી રહી અને ખામીયુક્‍ત બાળકની જવાબદારી અમારા માથે થોપીને તે અમને બરબાદ કરવા માગે છે. જોકે કેનેડાની કોર્ટે આ વાત માન્‍ય રાખી નહીં. કોર્ટનું કહેવું છે કે બાળકને અબોર્ટ કરવું કે નહીં એ તે જ વ્‍યક્‍તિ નક્કી કરી શકે જેના ગર્ભમાં બાળક હોય. એ પછી તો ડિલિવરી પણ થઈ ગઈ. યુગલ એ બાળકને પણ લઈ ગયું અને પ્રેગ્નન્‍સી દરમ્‍યાનનો ખર્ચ પણ ન આપ્‍યો. હજી પાંચ કરોડના દાવાનો કેસ ચાલી રહ્યો છે.