<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 19th November 2026

ભારતીય પ્રવાસીઓ અને ટૂરિઝમ જગતમાં મોટો ભૂકંપ: જાન્યુઆરી ૨૦૨૭થી મલેશિયામાં વિઝા-ફ્રી એન્ટ્રી બંધ કરવાના સનસનાટીભર્યા નિર્ણયથી ભારે હાહાકાર

વિદેશ ફરવાના સપના જોતા લાખો પ્રવાસીઓના છાતીના પાટિયા બેસી ગયા:અચાનક વિઝા-ફ્રી સુવિધા બંધ થવાની જાહેરાતથી ટ્રાવેલ એજન્ટો અને મુસાફરોમાં ભારે ખળભળાટ: હવે પ્રવાસ મોંઘો અને જટિલ બનવાની દહેશત

નવી દિલ્હી: વિદેશ પ્રવાસનું આયોજન કરી રહેલા ભારતીય પ્રવાસીઓ માટે આંતરરાષ્ટ્રીય સ્તરેથી એક અત્યંત ચોંકાવનારો, નિરાશાજનક અને સનસનાટીભર્યો નિર્ણય સામે આવ્યો છે. મલેશિયા પ્રવાસન અને ઈમિગ્રેશન નીતિમાં મોટા ફેરફારના સંકેત સાથે જાન્યુઆરી ૨૦૨૭થી ભારતીય નાગરિકો માટે આપવામાં આવતી 'વિઝા-ફ્રી એન્ટ્રી' (Visa-Free Entry) ની સુવિધા બંધ કરવાની જાહેરાત થતા સમગ્ર દેશના પ્રવાસીઓ અને ટ્રાવેલ ઈન્ડસ્ટ્રીમાં ભારે હડકંપ અને ચકચાર મચી ગઈ છે.

મલેશિયાના ઈમિગ્રેશન વિભાગ દ્વારા 17 નવેમ્બરના રોજ જારી કરાયેલી એક સત્તાવાર નોટિસમાં આ નિર્ણયની જાહેરાત કરવામાં આવી છે, જેમાં પુષ્ટિ કરાઈ છે કે ભારતીય નાગરિકો માટેની વર્તમાન વિઝા મુક્તિ વર્ષ 2026ના અંતમાં સમાપ્ત થઈ જશે.

સુધારેલા પ્રવેશ નિયમો હેઠળ, 1 જાન્યુઆરી 2027ના રોજ અથવા તે પછી મલેશિયાની મુલાકાત લેવાનું આયોજન કરી રહેલા તમામ ભારતીય પાસપોર્ટ ધારકોએ તેમના આગમન પહેલાં વિઝા મેળવવા પડશે. નવા નિયમો અમલમાં આવે તેના 1 મહિના પહેલા એટલે કે 1 ડિસેમ્બર 2026થી મલેશિયન સત્તાધીશો ભારતીય નાગરિકોને 'MyVISA' ઓનલાઈન પોર્ટલ દ્વારા વિઝા અરજી સબમિટ કરવાની મંજૂરી આપશે.

નોંધનીય છે કે મલેશિયાએ કોવિડ-19 મહામારી બાદ પર્યટનને વેગ આપવા માટે ડિસેમ્બર 2023માં ભારતીય નાગરિકો માટે વિઝા-ફ્રી એન્ટ્રી શરૂ કરી હતી. આ પગલાથી મલેશિયા આવતા ભારતીય પ્રવાસીઓની સંખ્યામાં મોટો વધારો થયો હતો. જોકે, સપ્ટેમ્બર 2026 માં કુઆલાલંપુર સ્થિત ભારતીય હાઈ કમિશને આ સુવિધાના દુરુપયોગ અંગે ગંભીર ચિંતા વ્યક્ત કરી હતી. હાઈ કમિશને ચેતવણી આપી હતી કે મોટી સંખ્યામાં ભારતીય નાગરિકો નોકરી શોધવા માટે ટુરિસ્ટ વિઝા પર મલેશિયામાં પ્રવેશી રહ્યા છે. એવી પણ ચેતવણી આપવામાં આવી હતી કે કેટલાક પ્રવાસીઓને નકલી નોકરીઓની ઓફર કરતા એજન્ટો દ્વારા ગેરમાર્ગે દોરવામાં આવી રહ્યા છે, જેના કારણે તેમના પર ઓવરસ્ટેઈંગ, શોષણ, અટકાયત અને કાયદાકીય કાર્યવાહીનું જોખમ ઊભું થઈ રહ્યું છે.

 

(6:06 PM IST)