નવી દિલ્હી: ટેક જાયન્ટ મેટા હવે માત્ર સોશિયલ મીડિયા પ્લેટફોર્મ પૂરતી મર્યાદિત રહેવા માંગતી નથી. કંપનીએ હવે અંતરિક્ષમાંથી વીજળી મેળવવાની દિશામાં કામ શરૂ કર્યું હોવાના અહેવાલોથી વિજ્ઞાન જગતમાં ખળભળાટ મચી ગયો છે. આ પ્લાન મુજબ, અંતરિક્ષમાં વિશાળ સોલાર પેનલો સ્થાપિત કરવામાં આવશે જે ૨૪ કલાક સૂર્યપ્રકાશ મેળવશે અને તે ઊર્જાને વાયરલેસ ટેકનોલોજી (બીમિંગ) દ્વારા પૃથ્વી પરના રિસીવિંગ સ્ટેશનો સુધી પહોંચાડવામાં આવશે.

Overview Energyની સિસ્ટમનું પ્રથમ ઓર્બિટલ ડેમોન્સ્ટ્રેશન 2028માં થવાની શક્યતા છે, જ્યારે વ્યાવસાયિક સ્તરે વીજળી સપ્લાય 2030 સુધી શરૂ થવાની યોજના છે. આ કરાર દ્વારા મેટાને આ નવીન સિસ્ટમમાંથી એક ગીગાવોટ જેટલી ક્ષમતાનો શરૂઆતમાં ઍક્સેસ મળશે. જોકે, આ કરારની નાણાકીય વિગતો હજુ જાહેર કરવામાં આવી નથી.

મેટા આર્ટિફિશિયલ ઇન્ટેલિજન્સ અને ડેટા સેન્ટરો માટે વધતી ઊર્જાની માંગને ધ્યાનમાં રાખીને લાંબા ગાળાના ઊર્જા પુરવઠા કરારો કરી રહી છે. કંપની ન્યુક્લિયર ઊર્જા સહિત વિવિધ ઊર્જા સ્ત્રોતોમાં પણ રોકાણ કરી રહી છે. Overview Energy સાથેનો આ કરાર મેટાના સસ્ટેનેબલ ભવિષ્ય તરફના પ્રયાસોમાં વધુ એક મહત્ત્વપૂર્ણ પગલું છે, કારણ કે તે કાર્બન ઉત્સર્જન ઘટાડવા અને ફોસિલ ફ્યુઅલ્સ પરની નિર્ભરતા ઓછી કરવા માંગે છે.

Overview Energyની અંતરિક્ષ આધારિત સોલર પાવર ટેક્નોલોજીમાં અંતરિક્ષમાં ઉપલબ્ધ અનલિમિટેડ સૂર્ય ઊર્જા એકત્રિત કરીને તેને નીર-ઇન્ફ્રારેડ લાઇટમાં પરિવર્તિત કરવામાં આવશે. ત્યારબાદ આ પ્રકાશ પૃથ્વી પરના મોટા સોલર ફાર્મ્સ સુધી મોકલવામાં આવશે, જ્યાં તેને ફરીથી વીજળીમાં પરિવર્તિત કરવામાં આવશે. કંપનીને આશા છે કે આ પદ્ધતિ હાઈ-પાવર લેઝર અથવા માઇક્રોવેવ બીમ દ્વારા પૃથ્વી સુધી ઊર્જા મોકલવામાં આવતા ટેક્નિકલ અને સલામતી સંબંધિત પડકારોને દૂર કરશે.