લખનૌ,તા.૨૨: ઉત્તર પ્રદેશની ૭ વર્ષની એક છોકરીનો કિસ્‍સો ડોક્‍ટરને પણ અચંબિત કરનારો છે. સામાન્‍ય રીતે માણસના શરીરમાં બે કિડની હોય છે, પરંતુ આ કન્‍યાના શરીરમાં ૪ કિડની છે. જોકે એ ૪ પણ પાછી આખી નથી. ચારેય અડધી-અડધી અને એકબીજા સાથે જોડાયેલી અને ઓછી વિકસિત છે. મેડિકલ ભાષામાં એને ડુપ્‍લેક્‍સ કિડની કહેવાય. 

સામાન્‍ય રીતે બે કિડનીમાંથી એક-એક નળી બહાર નીકળે છે, પણ આ કન્‍યાના શરીરમાં ચાર કિડનીઓ એકબીજામાં ભળેલી અને એમાંથી ચાર નળીઓ નીકળતી હોય એવી ગૂંચળાદાર રચના છે. નેફ્રોલોજિસ્‍ટોએ આ ગૂંચળાને રિપેર કરવા માટે રોબોટિક સર્જરી કરવાનો પ્‍લાન કર્યો છે.