બેંગલુરુ : દેશની સર્વોચ્ચ બિઝનેસ સ્કૂલોમાં ગણાતી ઇન્ડિયન ઇન્સ્ટિટ્યૂટ ઓફ મેનેજમેન્ટ (IIM) બેંગ્લોરમાં જ્યાં મોટાભાગના વિદ્યાર્થીઓ ૨૫ થી ૪૦ લાખ રૂપિયાના વાર્ષિક પેકેજવાળી કોર્પોરેટ નોકરી મેળવવાની તૈયારીઓમાં મશગૂલ હોય છે, ત્યાં ૨૫ વર્ષીય વિદ્યાર્થી ઝૈદ ખાને ઈતિહાસ રચી દીધો છે. MBA ના અભ્યાસની સાથે સાથે ઝૈદે અંદાજે ₹૫ કરોડની નેટવર્થ ધરાવતી પોતાની સોશિયલ મીડિયા અને બ્રાન્ડિંગ એજન્સી 'ઝેડિટલ મીડિયા' (Zedital Media) ઊભી કરીને સૌને ચોંકાવી દીધા છે.

ડોક્ટર-એન્જિનિયર બનવાના દબાણ વચ્ચે પસંદ કર્યો અલગ રસ્તો:

તાજેતરમાં જ જાણીતા 'ધ કરોડ ક્લબ' પોડકાસ્ટમાં હોસ્ટ શ્રેયા હેગડે સાથેની વાતચીતમાં ઝૈદે પોતાની પ્રેરણાદાયી સફર વિશે ખુલાસો કર્યો હતો. એક સામાન્ય મધ્યમ વર્ગના પરિવારમાં ઉછરેલા ઝૈદ પર ધોરણ ૧૨ દરમિયાન NEET પરીક્ષા પાસ કરીને ડોક્ટર કે એન્જિનિયર બનવાનું ભારે દબાણ હતું. જોકે, તેણે પરંપરાગત માર્ગ છોડીને યુટ્યુબર્સ સાથે ફ્રીલાન્સિંગનું કામ શરૂ કર્યું. કેલિફોર્નિયાના એક ઈન્ફ્લુએન્સર માટે ફ્રીલાન્સિંગ કરતી વખતે મળેલો ₹૧.૨૪ લાખનો ચેક તેની જિંદગીનો ટર્નિંગ પોઈન્ટ બન્યો, જેણે તેને પોતાના દમ પર આગળ વધવાનો આત્મવિશ્વાસ આપ્યો.

'ઝેડિટલ મીડિયા' નું ગઠન અને મળેલી સિદ્ધિઓ:

૨૦૨૨ માં માસ કોમ્યુનિકેશનમાં સ્નાતક થયા બાદ સપ્ટેમ્બર ૨૦૨૪ માં IIM બેંગ્લોરમાં પ્રવેશ મેળવનાર ઝૈદે 'ઝેડિટલ મીડિયા પ્રાઇવેટ લિમિટેડ' ની સ્થાપના કરી. આ કંપની ઓનલાઇન રેપ્યુટેશન મેનેજમેન્ટ (ORM), કન્ટેન્ટ ડિસ્ટ્રિબ્યુશન અને LinkedIn પ્રોફાઇલ એમ્પ્લીફિકેશન જેવી સેવાઓ પૂરી પાડે છે. તેની આ સિદ્ધિ બદલ તેને 'ઉત્તરાખંડના યંગેસ્ટ એન્ટરપ્રેન્યોર' અને 'ઇનોવેટિવ એન્ટરપ્રેન્યોર ૨૦૨૪' જેવા અનેક રાષ્ટ્રીય એવોર્ડ્સથી પણ નવાજવામાં આવ્યો છે.

નવા ઉદ્યોગસાહસિકો માટે ઝૈદની ગોલ્ડન ટિપ્સ:

પોડકાસ્ટ દરમિયાન યુવાઓને સલાહ આપતાં ઝૈદે જણાવ્યું હતું કે, "જો તમે પણ બિઝનેસ કરવા માંગો છો, તો રાહ ન જુઓ. તમારી પાસે રહેલી કોઈપણ સ્કીલ કે સેવા માત્ર ₹૧૦૦ કે ₹૨૦૦ માં પણ વેચવાનું શરૂ કરો, તેનાથી આત્મવિશ્વાસ વધશે. આજના ડિજિટલ યુગમાં કન્ટેન્ટ એ ખરી કરન્સી છે; તમારી ઓનલાઈન ઓળખ અને બ્રાન્ડ બનાવવા પર રોકાણ કરો, તકો આપોઆપ સામેથી આવશે."