પેશાવર :  પાકિસ્તાનમાં ઈન્ફ્રાસ્ટ્રક્ચરની અત્યંત ખરાબ સ્થિતિ અને જર્જરિત મકાનો ફરી એકવાર માસૂમ જિંદગીઓ માટે કાળ સાબિત થયા છે. શનિવારે દેશના બે અલગ-અલગ પ્રાંતોમાં દૂધે ધોયેલી માસૂમ બાળકીઓ સહિત ૬ લોકો માટી અને કંકરના કાટમાળ નીચે દટાઈ જતાં ભયાનક દુર્ઘટના સર્જાઈ છે. ઉત્તરપશ્ચિમ પાકિસ્તાનના ખૈબર પખ્તુનખ્વા પ્રાંતમાં આવેલા હાંગુ જિલ્લાના દોઆબા તહસીલના જાદિદ બંદા વિસ્તારમાં એક જૂના મકાનની છત અચાનક તૂટી પડી હતી. આ કરુણ દુર્ઘટનામાં ૨ થી ૧૨ વર્ષની વયજૂથની ૪ નિષ્પાપ છોકરીઓના ઘટનાસ્થળે જ દર્દનાક મોત નીપજ્યા છે, જેનાથી સમગ્ર પંથકમાં અરેરાટી વ્યાપી ગઈ છે.

ઘટનાની જાણ થતાં જ પાકિસ્તાનની રાષ્ટ્રીય બચાવ સેવા 'રેસ્ક્યૂ 1122' ની ટીમો ઘટનાસ્થળે દોડી ગઈ હતી. ભારે મશક્કત બાદ કાટમાળ ખસેડીને બાળકીઓના મૃતદેહ બહાર કાઢી નજીકની હોસ્પિટલમાં મોકલવામાં આવ્યા હતા, જ્યાં તબીબોએ તેમને મૃત જાહેર કરી હતી. આવી જ બીજી હૃદયદ્રાવક ઘટના પાકિસ્તાન અધિકૃત ગિલગિટ-બાલતિસ્તાન (PoK) ના ગિલગિટ જિલ્લામાં આવેલા બસીન વિસ્તારની મિયાં કોલોનીમાં બની હતી. ત્યાં પણ એક જૂનું, જર્જરિત મકાન અચાનક ધડાકાભેર ધરાશાયી થઈ ગયું હતું, જેમાં દટાઈ જવાથી એક મહિલા અને એક માસૂમ બાળકનું કરૂણ મોત નીપજ્યું હતું, જ્યારે પરિવારના અન્ય ત્રણ સભ્યો ગંભીર રીતે ઘાયલ થયા હતા.

ઇમરજન્સી કર્મચારીઓએ સ્થાનિક લોકોની મદદથી ઘાયલોને તાત્કાલિક પ્રાથમિક સારવાર આપીને પ્રાંતીય મુખ્યાલય હોસ્પિટલમાં દાખલ કર્યા છે. પાકિસ્તાનમાં આર્થિક કટોકટી અને યોગ્ય માળખાકીય સુવિધાઓના અભાવે અસંખ્ય નાગરિકો અત્યંત જોખમી અને જર્જરિત મકાનોમાં રહેવા મજબૂર બન્યા છે, જેના કારણે ચોમાસા અને હવામાન બદલાતા આવી દુર્ઘટનાઓ અવારનવાર સર્જાતી રહે છે. આ ઘટનાએ ફરી એકવાર પાકિસ્તાની પ્રશાસન અને સ્થાનિક તંત્રની નિષ્ક્રિયતા સામે ગંભીર સવાલો ઊભા કર્યા છે.