News of Tuesday, 14th May 2024
દિલ્હીમાં હોસ્પિટલોને મળી બોમ્બની ધમકી
ધમકીને પગલે પોલીસે તપાસ શરૃ કરીઃહોસ્પિટલોમાં બોમ્બ હોવાની માહિતી ઇમેઇલ દ્વારા અપાઇ

નવીદિલ્હી,તા.૧૪
દિલ્હીની ઘણી હોસ્પિટલોને બોમ્બથી ઉડાવી દેવાનો કોલ કરવામાં આવ્યો છે. દિલ્હી ફાયર વિભાગના જણાવ્યા અનુસાર, તેમને ઘણી અલગ-અલગ હોસ્પિટલોમાંથી કોલ આવ્યા હતા જેમાં ગુરુ તેગ બહાદુર હોસ્પિટલ, દાદા દેવ હોસ્પિટલ, હેડગેવાર હોસ્પિટલ અને દીપ ચંદ બંધુ હોસ્પિટલમાં બોમ્બ હવાનો કોલ કરવામાં આવ્યો હતો.
ફાયર વિભાગના જણાવ્યા અનુસાર તમામ કોલ વેરિફાઈ કરવામાં આવી રહ્યા છે. હોસ્પિટલોમાં બોમ્બ હોવાની માહિતી ઇમેઇલ દ્વારા આપવામાં આવી છે. આ પછી હોસ્પિટલોએ પોલીસ અને ફાયર વિભાગને આની જાણકારી આપી હતી.
અગાઉ રવિવારે દિલ્હીમાં ૨૦ હોસ્પિટલા, IGI એરપોર્ટ અને ઉત્તર રેલવેની CPRO ઓફિસને બોમ્બની ધમકી સાથે ઈમેલ મોકલવામાં આવ્યો હતો. આ ધમકી એવા સમયે આવી છે જ્યારે ૧ મેના રોજ, દિલ્હી-નેશનલ કેપિટલ રિજન (NCR) ની ૧૫૦ થી વધુ શાળાઓને બોમ્બથી ઉડાવી દેવાની ધમકી આપતો ઈમેલ મળ્યો હતો, જેના કારણે વિદ્યાર્થીઓ અને વાલીઓમાં ગભરાટ ફેલાયો હતો.
અધિકારીઓને તપાસ દરમિયાન કંઈ વાંધાજનક મળ્યું ન હતું. અધિકારીઓના જણાવ્યા અનુસાર, જ્યારે શાળાઓને રશિયા સ્થિત ઈ-મેલ સેવા તરફથી ધમકીઓ મળી હતી, ત્યારે હોસ્પિટલો અને અન્ય બે સંસ્થાઓને રવિવારે યુરોપ સ્થિત ઈ-મેલ સેવા કંપની 'Bible.com' તરફથી ધમકીઓ મળી હતી. પોલીસ અધિકારીના જણાવ્યા અનુસાર, ઈ-મેલ એક હોસ્પિટલને મોકલવામાં આવ્યો હતો અને સમાન સામગ્રી સાથેની નકલો અન્ય હોસ્પિટલોને પણ મોકલવામાં આવી હતી.હોસ્પિટલોને ધમકીભર્યા ઈ-મેઈલમાં કહેવામાં આવ્યું હતું કે, "મેં તમારા બિલ્ડિંગમાં વિસ્ફોટક ઉપકરણો મૂક્યા છે. તેઓ આગામી કલાકમાં વિસ્ફોટ કરશે. આ કોઈ ધમકી નથી, તમારી પાસે બોમ્બને ડિફ્યુઝ કરવા માટે થોડા કલાકો છે, નહીં તો બિલ્ડિંગની અંદર નિર્દોષ લોકોનું લોહી વહશે. . આની પાછળ 'કોર્ટ' નામનું સંગઠન હોવાનું કહેવાય છે.
દરમિયાન દિલ્હી પોલીસ શાળાઓ, હોસ્પિટલો અને એરપોર્ટ સહિત વિવિધ સંસ્થાઓને ઈ-મેલ દ્વારા મોકલવામાં આવેલી ધમકીઓ પાછળના ષડયંત્રનો પર્દાફાશ કરવા માટે અન્ય રાજ્યોમાં તેના સમકક્ષો સાથે સમગ્ર ભારતમાં તપાસ કરી શકે છે. અધિકારીઓએ સોમવારે આ માહિતી આપી. દિલ્હી પોલીસના એક અધિકારીએ જણાવ્યું કે અહીંના અધિકારીઓ ઈ-મેલ કેવી રીતે મોકલવામાં આવ્યા હતા તેનું વિશ્લેષણ કરી રહ્યા છે અને અન્ય રાજ્યોના પોલીસનો સંપર્ક કરવાની યોજના બનાવી રહ્યા છે.
(7:50 PM IST)









છેલ્લા 8 દિવસમાં સૌથી લોકપ્રિય 
