અમેરિકામાં ૨૫ ટકાથી વધુ લોકો એક ટંક ભૂખ્યા રહેવા લાગ્યા : કરિયાણું નથી પોસાતું
અમેરિકા દુનિયાનો સૌથી ધનિક દેશ હોવા છતાં ત્યાંના ઓછી આવક ધરાવતા લોકોને મોંઘવારી સતાવી રહી છે : ગ્રોસરીના ભાવ સતત વધતા જાય છે ત્યારે લોકોની આવકમાં એટલો વધારો નથી થયો : માસિક આવકનો ૬૦ ટકાથી વધુ હિસ્સો ફૂડ, વીજળી અને ઘરના ભાડામાં જતો રહે છે
ન્યુયોર્ક, તા.૧૪: દુનિયાના સૌથી ધનિક અને સૌથી શક્તિશાળી દેશ અમેરિકામાં બધા જ લોકોની સ્થિતિ સારી છે એવું નથી. એક સરવે પ્રમાણે ૨૫ ટકાથી વધુ અમેરિકનોને ત્રણેય ટંક પેટ ભરીને ખાવાનો ખર્ચ પોસાતો નથી તેથી લોકો ભૂખ્યા રહે છે અને દરરોજ એક ટાઈમ ખાવાનું ટાળે છે. ભારતની જેમ અમેરિકામાં પણ કરિયાણાના ભાવ આસમાને પહોંચી ગયા છે અને દર ચારમાંથી એક અમેરિકનને આ ભાવ પોસાતા નથી.
અમેરિકા માટે આ અત્યાર સુધીનો સૌથી આંચકાજનક રિપોર્ટ ગણવામાં આવે છે. ક્વોલટ્રિક્સ દ્વારા કરવામાં આવેલા સરવેમાં ૮૦ ટકા જેટલા અમેરિકનોએ કહ્યું કે તાજેતરના વર્ષોમાં ગ્રોસરીનો ખર્ચ ઘણો વધી ગયો છે. મોટા ભાગના કહે છે કે ગ્રોસરીના ભાવ તેમની પહોંચની બહાર જતા રહ્યા છે. આ કારણથી ઘણા લોકો એક ટંક ભૂખ્યા પણ રહે છે. ૩૩ ટકાથી વધુ અમેરિકનોએ કહ્યું કે તેમની માસિક આવકનો ૬૦ ટકાથી વધુ હિસ્સો ફૂડ, વીજળી અને ઘરના ભાડામાં જતો રહે છે. આ બધા ફરજિયાત ખર્ચ છે અને તેમાં કાપ મૂકવાનું શકય નથી.
કન્ઝ્યુમર ફાઈનાન્શિયલ એડવોકેટ કોર્ટની એલેવે કહ્યું કે અમેરિકામાં હવે ફૂડ સિકયોરિટી બહુ મોટો પ્રશ્ન બની ગયો છે અને લાખોપ્રકરોડો અમેરિકનો પાસે પૂરતું ભોજન નથી અથવા તો તેમને હેલ્થી ફૂડ ખાવું પોસાય તેમ નથી. ફૂડ પ્રોડક્ટ અને અનાજના ભાવમાં એટલો બધો વધારો થયો છે કે લોકો મુશ્કેલીમાં છે. ખાસ કરીને જેમની ઓછી આવક છે અને જેમણે પરિવાર ચલાવવો છે તે લોકોનની આવી હાલત છે. હમણાં ફૂડના ફુગાવામાં થોડો ઘટાડો થયો છે છતાં બીજી બધી ચીજોના ભાવ વધી રહ્યા છે. જેમ કે ભાડું અને પેટ્રોલનો ખર્ચ વધી ગયો છે તેથી લોકો નાણાકીય રીતે મુશ્કેલીમાં છે.
કોવિડ આવ્યો ત્યાર પછી આખી દુનિયામાં ચીજ વસ્તુઓ મોંઘી થઈ છે જેમાંથી અમેરિકા પણ બાકાત નથી. અમેરિકામાં કોવિડ પછી ગ્રોસરીના ભાવમાં સરેરાશ ૨૫ ટકાનો વધારો થયો છે. એપ્રિલ ૨૦૨૪માં કરિયાણાના ભાવમાં સહેજ ઘટાડો થયો હતો. પરંતુ હજુ પણ તે ઉંચા લેવલ પર જ છે. આ સરવેમાં ભાગ લેનારા ૪૪ ટકા અમેરિકનોએ કહ્યું કે તેઓ ફાઈનાન્શિયલ રીતે અસ્થિર - અનસ્ટેબલ છે. જે અમેરિકન ફેમિલીની વાર્ષિક આવક ૫૦ હજાર ડોલર કરતા ઓછી છે તેમની હાલત વધુ ખરાબે છે.
ભારતમાં જે રીતે લોકોની આવક કરતા જાવક વધી જાય અને જરૂરી ખર્ચ કરવા પણ ન પોસાય ત્યારે લોકો દેવું કરતા હોય છે. અમેરિકામાં પણ લોકો દેવું વધારી રહ્યા છે અને આ સરવેમાં જાણવા મળ્યું કે ૫૫ ટકા લોકો દેવું કરી રહ્યા છે. ૮૦ ટકા લોકોએ કહ્યું કે તેમને સૌથી વધુ ચિંતા ગ્રોસરીના ભાવની છે. ત્યાર પછી પેટ્રોલ, મકાનનું ભાડું અથવા લોનના હપતા અને વીજળીના બિલની ચિંતા હોય છે. મોટા ભાગના લોકોએ કહ્યું કે બહાર રેસ્ટોરન્ટમાં જઈને ખાવાનું તેમને પોસાતું નથી.
૨૬ ટકા લોકોએ એવું કહ્યું કે સારી કવોલિટીનું ફૂડ પોસાતું ન હોવાથી તેઓ અનહેલ્ધી ફૂડ ખાતા થઈ ગયા છે. ૨૧ ટકાએ કહ્યું કે તેઓ પરિવાર માટે કરિયાણું ખરીદી શકે તેવી સ્થિતિમાં ન હોવાથી તેમને શરમ અનુભવાય છે. અમેરિકામાં ૭ મેથી ૧૩ મે વચ્ચે આ સરવે કરવામાં આવ્યો હતો અને તેમાં બે હજારથી વધુ લોકોએ ભાગ લીધો હતો.
અમેરિકામાં તાજેતરમાં એવા પણ અહેવાલ આવ્યા છે કે ગરીબી રેખાની ઉપર રહેતા હોય તેવા લોકોને પણ ફૂડ પ્રાઈસ પોસાતા નથી. આ લોકોની આવક થોડી વધારે હોવાના કારણે સરકારી હેલ્પ મળતી નથી અને તેની સામે ફૂડના ભાવ પણ પોસાતા નથી. આવા વર્ગને પે ચેકથી પે ચેક જીવનારો વર્ગ કહેવામાં આવે છે જેની પાસે આવક છે પરંતુ એટલી વધારે નથી કે ગ્રોસરી પાછળ છુટથી ખર્ચ કરી શકે.
એક સ્ટોર વર્કરે કહ્યું કે તે અઠવાડિયામાં ઓછામાં ઓછા ૪૦ કલાક કામ કરે છે અને તેમાં તેને આખા વર્ષમાં ૨૫ હજાર ડોલરની આસપાસ પગાર મળે છે. તેનાથી તે ગરીબી રેખાથી તો ઉપર છે પરંતુ રોજના બે ટંક પેટ ભરીને ખાઈ શકતી નથી. તેણે માત્ર એક ટંક ખાઈને ગુજરાન ચલાવવું પડે છે.
ઘણા લોકોને એક કે બે બાળકો હોય છે અને તેને સપોર્ટ કરવા માટે વધારે કલાક સુધી વૈતરુ કરવું પડે છે. આ રીતે આવક તો વધે છે પરંતુ ફૂડ પ્રાઈસના વધારાને પહોંચી શકાતું નથી. અમેરિકામાં એક આખો વર્ગ પોતાની ઓછી આવક અને વધતા ખર્ચના કારણે દુઃખી, હતાશ છે અને સરકાર સામે નારાજ છે.
અમેરિકામાં બે વ્યક્તિનો પરિવાર હોય તો તેના માટે ૨૦,૪૪૦ ડોલરની ફેડરલ પોવર્ટી લાઈન - ગરીબી રેખા નક્કી કરવામાં આવી છે. તેનાથી વધારે આવક હોય તો સરકારી હેલ્પ ગુમાવવી પડે છે. અમેરિકામાં લગભગ ૨૯ ટકા પરિવારો એ વર્ગમાં આવે છે જેઓ ગરીબી રેખાથી ઉપર છે, પરંતુ કમ્ફર્ટેબલ જીવન જીવી શકે તેટલી આવક નથી. એટલે કે તેઓ દેવામાં ડૂબી જાય છે અને પગારથી પગારની વચ્ચે જીવે છે. જ્યારે ૧૩ ટકા લોકો ગરીબી રેખાથી જ નીચે જીવે છે તેથી તેમને સરકારની હેલ્પ મળી રહે છે. અમેરિકાના કેટલાક શહેરોમાં ગેરંટેડ બેઝિક ઈન્કમ પ્રોગ્રામ શરૂ કરાયા છે પરંતુ તે પ્રોગ્રામનો લાભ સામાન્ય રીતે ગરીબી રેખાથી નીચે જીવતા પરિવારોને જ આપવામાં આવે છે. ઘણા લોકો એવા છે તેઓ એજ્યુકેટેડ હોવા છતાં આવી સ્થિતિમાં છે. કોલેજની ડિગ્રી ધરાવતી એક મહિલાએ કહ્યું કે તેણે ૫૦થી વધારે જગ્યાએ અરજી કરી છે પરંતુ તેને જોબ નથી મળી રહી. તેના બોયફ્રેન્ડ પાસે પણ જોબ નથી અને તેમાં પણ હેલ્થના ઈશ્યૂ થાય ત્યારે તેમણે ભૂખ્યા રહીને દિવસો કાઢવા પડે છે.
(3:36 PM IST)
છેલ્લા 8 દિવસમાં સૌથી લોકપ્રિય 
