૬ મહિનામાં ૧૦ લાખ ભારતીય કાગડાઓને મારી નખાશે
‘ઇન્ડિયન હાઉસ ક્રો'ને કેન્યામાં વિદેશી કાગડા ગણવામાં આવે છે : છેલ્લા ઘણા દાયકાઓથી લોકોને હેરાન - પરેશાન કરી રહ્યાનો દાવો
કેન્યાની સરકારે આગામી છ મહિનામાં ૧૦ લાખ કાગડાઓને મારી નાખવાની યોજના બનાવી છે. અહીં કાગડાઓ માત્ર જંગલી પક્ષીઓ માટે જ સમસ્યા નથી બની રહ્યા પરંતુ પ્રવાસી અને હોટલ ઉદ્યોગને પણ નુકસાન પહોંચાડી રહ્યા છે.કેન્યાની સરકારે ભારતીય કાગડાઓ સામે એક્શન લેવાનું શરૂ કરી દીધું છે. કેન્યા વાઇલ્ડલાઇફ સર્વિસનું કહેવું છે કે આ ‘ઇન્ડિયન હાઉસ ક્રો' વિદેશી પક્ષીઓ છે, જે છેલ્લા ઘણા દાયકાઓથી ત્યાં રહેતા લોકોને પરેશાન કરી રહ્યા છે. KWS એ વર્ષ ૨૦૨૪ના અંત સુધીમાં કેન્યાના સમગ્ર તટીય વિસ્તારમાંથી ૧૦ લાખ કાગડાઓને ખતમ કરવાની જાહેરાત કરી છે. આ કાળા કાગડાઓ ભારતીય મૂળના હોવાનું કહેવાય રહ્યું છે.
એવું માનવામાં આવે છે કે તે ૧૯૪૦ ની આસપાસ પૂર્વ આફ્રિકા જઈ પહોંચ્યા હતા. ત્યારથી તેમની સંખ્યામાં નોંધપાત્ર વધારો થયો છે અને તેઓ આક્રમક બની રહ્યા છે.
કેન્યા સરકારનું કહેવું છે કે આ વિદેશી કાગડાઓને કારણે કેન્યાના મૂળના પક્ષીઓની સંખ્યા ઘણી ઘટી ગઈ છે. આમાં સ્કેલી બબ્લર્સ, પાઈડ કાગડા, માઉસ-કલર્ડ સનબર્ડ, વીવર બર્ડ્સ, કોમન વેક્સબિલ અને પાણીની નજીક રહેતા પક્ષીઓનો પણ સમાવેશ થાય છે.
કેન્યાના પક્ષી નિષ્ણાત કોલિન જેક્સનનું કહેવું છે કે આ ભારતીય કાગડાઓને કારણે કેન્યાના દરિયાઈ વિસ્તારોમાં નાના, સ્થાનિક પક્ષીઓની સંખ્યામાં ઘણો ઘટાડો થયો છે. આ ભારતીય કાગડાઓ નાના પક્ષીઓના માળાઓનો નાશ કરે છે. પછી તેમના ઈંડા અને બચ્ચાઓ ખાઈ જાય છે.
કોલિન જેક્સને કહ્યું, ‘જયારે જંગલના વાસ્તવિક પક્ષીઓ ઓછા થઈ જાય છે, ત્યારે સમગ્ર પર્યાવરણ બગડે છે. જંતુઓ અને અન્ય નાના જીવો પુષ્કળ પ્રમાણમાં વધે છે, જેના કારણે એક પછી એક સમસ્યા ઊભી થાય છે. આ કાગડાઓ માત્ર પક્ષીઓને જ અસર કરતા નથી, પરંતુ સમગ્ર પર્યાવરણને પણ નુકસાન કરે છે.'
એવું કહેવામાં આવી રહ્યું છે કે આ કાગડાઓ માત્ર જંગલી પક્ષીઓ માટે જ સમસ્યા નથી, પરંતુ પ્રવાસીઓ અને હોટેલ ઉદ્યોગને પણ ઘણી મુશ્કેલી ઉભી કરી રહ્યા છે. આ બંને ઉદ્યોગો કેન્યા માટે વિદેશી હૂંડિયામણ કમાવવા માટે ખૂબ જ મહત્ત્વપૂર્ણ છે. દરિયા કિનારે આવેલી હોટેલ માલિકોનું કહેવું છે કે આ કાગડા પ્રવાસીઓને જમતી વખતે ખૂબ હેરાન કરે છે.
કેન્યામાં સ્થાનિક મરઘાં ખેડૂતો પણ કાગડાઓથી પરેશાન છે. કારણ કે આ કાગડા દરરોજ ૧૦-૨૦ બચ્ચાઓને લઈ જાય છે. તેથી, મરઘીઓનાં બચ્ચાની વધુ કાળજી લેવાની જરૂર પડે છે. તેઓ મોટી સંખ્યામાં આવે છે અને ખૂબ જ હોંશિયાર હોય છે. કેટલાક કાગડાઓ મરઘીઓ અને બતકોનું ધ્યાન ભટકાવે છે, પછી કાગડાઓનું બીજું ગ્રુપ બચ્ચાઓ પર હુમલો કરે છે. આને કારણે ખેડૂતો પણ આ વધી રહેલા કાગડાઓથી પરેશાન છે.
આ પહેલીવાર નથી જયારે કેન્યા સરકાર કાગડાઓની સંખ્યા ઘટાડવાનો પ્રયાસ કરી રહી છે. વાઇલ્ડ લાઇફ ડિપાર્ટમેન્ટ અનુસાર, લગભગ ૨૦ વર્ષ પહેલાં આવો જ પ્રયાસ કરવામાં આવ્યો હતો અને તે સમયે પક્ષીઓની સંખ્યામાં પણ ઘટાડો થયો હતો. પરંતુ આ કાગડા ખૂબ જ હોંશીયાર છે. માણસોની આસપાસ જ રહે છે, જેના કારણે તેમની સંખ્યા ફરી વધી છે. તેથી જ નવી યોજના બનાવવામાં આવી છે. આ વખતે કેન્યા સરકાર કાગડાઓને ખતમ કરવા માટે ઘણી પદ્ધતિઓ અપનાવી રહી છે. આ યોજના હોટેલીયર્સ, કાગડાને મારવાની વ્યવસ્થા કરનારા ડોક્ટરો, વન બચાવ સંસ્થાઓ અને સંશોધન સંસ્થાઓના સહયોગથી બનાવવામાં આવી છે.
(4:09 PM IST)
છેલ્લા 8 દિવસમાં સૌથી લોકપ્રિય 
