નવી દિલ્હી,તા. ૧૮: દિલ્હીના રાજીવ ગાંધી કેન્સર ઇન્સ્ટીટ્યુટ એન્ડ રિસર્ચ સેન્ટર અને ગુરૂગ્રામના ડોકટરોની ટીમ ટેલીસર્જરી ટેકનીક દ્વારા ૪૦ કિલોમીટર દૂર દાખલ કેન્સરના દર્દીનું સફળ ઓપરેશન કર્યું હતું. ઓપરેશન ૧ કલાક ૪૫ મિનિટ ચાલ્યુ હતું.આ ઓપરેશનમાં કાપો મુકવાથી માંડી ટયુમર કાઢવા અને ટાંકા લેવા સુધીની પ્રક્રિયા વર્ચ્યુઅલી કરવામાં આવી હતી. આ ઓપરેશન ડો.સુધીર રાવલ અને તેમની ટીમ દ્વારા સફળતાથી કરવામાં આવ્યુ હતું. ઓપરેશન દરમિયાન ઇન્ટરનેટ અથવા ટેકનીકલ કોઇ મુશ્કેલી ન આવે તેનું ખાસ ધ્યાન રખાયુ હતું. સમગ્ર ઓપરેશન સર્જીકલ રોબોટીક સીસ્ટમથી થયું હતું.