News of Wednesday, 19th June 2024
ઓ બાપ રે..! હોંગકોંગમાં ઘરનું ભાડું ૪ લાખ અને કામવાળાને મહિને ૫૦,૦૦૦ નો પગાર
વાળ કાપવા માટે ૫૦૦૦ રૂપિયા સુધીનો ખર્ચઃ એક લિટર દૂધની કિંમત આશરે રૂ. ૨૭૦-૩૨૦: બ્રાન્ડેડ જીન્સ પેન્ટ માટે ૫,૩૦૦ થી ૧૦,૫૦૦ રૂપિયા ચૂકવવા પડશે : ઇન્ટરનેટ માટે તમારે દર મહિને ૨,૨૦૦ થી ૫,૫૦૦ રૂપિયા ચૂકવવા પડે છેઃ પાર્ટ-ટાઇમ હેલ્પર જોઈએ છે, તો તમારે કલાકદીઠ ચૂકવણી કરવી પડશે. ૧ કલાક માટે તમારે રૂા.૭૦૦ થી રૂા. ૧,૫૦૦ ચૂકવવા પડશે

હોંગકોંગ,તા. ૧૯: બિહાર, પヘમિ બંગાળ, ઉત્તર પ્રદેશ, હરિયાણા, હિમાચલ અને અન્ય રાજયોમાંથી જે લોકો કામની શોધમાં દિલ્હી અથવા મુંબઈ જાય છે તેઓને લાગે છે કે ત્યાં રહેવાની કિંમત ઘણી વધારે છે. મોટાભાગના લોકો આ માટે મોંઘા ઘરના ભાડાને જવાબદાર માને છે. ભારતમાં દિલ્હી, મુંબઈ અને બેંગ્લોર મોંઘા છે, પરંતુ શું તમે જાણો છો કે વિશ્વભરમાં મોંઘવારી માટે કુખ્યાત શહેરોની ટોચની યાદીમાં કોનું નામ આવે છે?
લેટેસ્ટ મર્સરનો ૨૦૨૪ કોસ્ટ ઓફ લિવિંગ રિપોર્ટ દર્શાવે છે કે બહારથી કામ કરવા આવતા લોકો માટે હોંગકોંગ સૌથી મોંઘું શહેર છે. તે પછી સિંગાપોરનું નામ આવે છે. સ્વિટ્ઝર્લેન્ડના ચાર શહેરો ત્રીજા, ચોથા, પાંચમા અને છઠ્ઠા સ્થાને આવે છે. તેમાં ઝ્યુરિચ, જીનીવા, બેસલ અને બર્નના નામ સામેલ છે. ટોપ ૩૦માં ભારતના કોઈ શહેરનું નામ નથી.
આજે અમે તમને જણાવી રહ્યા છીએ કે સૌથી મોંઘા શહેર હોંગકોંગમાં રહેવાની કિંમત કેટલી છે. જયારે અમે હોંગકોંગમાં રહેવાની કિંમત પર થોડું સંશોધન કર્યું ત્યારે અમને એવી બાબતો જાણવા મળી કે અમે જાણીને દંગ રહી ગયા. ઉદાહરણ તરીકે, શહેરમાં સારા સ્થાને ૧ બેડરૂમનું એપાર્ટમેન્ટ ખરીદવા માટે, તમારે ૨૦,૦૦૦ થી ૩૫,૦૦૦ HKD (હોંગકોંગ ડોલર) ચૂકવવા પડશે. ભારતીય ચલણમાં તે અંદાજે રૂ. ૨.૨૫ લાખથી રૂ. ૪.૪ લાખ સુધીની છે. એક હોંગકોંગ ડોલર ભારતીય ચલણના રૂ. ૧૦.૭૦ બરાબર છે.
હોંગકોંગમાં, એક લિટર દૂધની કિંમત ૨૫ થી ૩૦ HKD (હોંગકોંગ ડોલર) છે. ભારતીય ચલણમાં આશરે રૂ. ૨૭૦-૩૨૦. હવે આપણે ફક્ત ભારતીય ચલણના સંદર્ભમાં જ વાત કરીશું, કારણ કે તેના દરને સમજવામાં સરળતા રહેશે. બ્રાન્ડેડ જીન્સ પેન્ટ માટે ૫,૩૦૦ થી ૧૦,૫૦૦ રૂપિયા ચૂકવવા પડશે. અમે બાકીના ખર્ચ વિશે વિગતવાર જણાવીશું, પરંતુ તે પહેલા અમે તમને તે ૩૦ શહેરોના નામ જણાવીએ જે આ રિપોર્ટમાં સામે આવ્યા છે.
અમે તમને ઉપર ૬ નામ કહ્યા છે, વધુ નામો આ પ્રમાણે છે- ૭. ન્યુયોર્ક, અમેરિકા, ૮. લંડન, ઈંગ્લેન્ડ, ૯. નાસાઉ, બહામાસ, ૧૦. લોસ એન્જલસ, યુએસએ, ૧૧. કોપનહેગન, ડેનમાર્ક, ૧૨. હોનોલુલુ, અમેરિકા, ૧૩. સાન ફ્રાન્સિસ્કો, યુએસએ, ૧૪. બાંગુઈ, સેન્ટ્રલ આફ્રિકન રિપબ્લિક, ૧૫. દુબઈ, સંયુક્ત આરબ અમીરાત, ૧૬. તેલ અવીવ, ઇઝરાયેલ, ૧૭. મિયામી, અમેરિકા, ૧૮. જીબુટી, જીબુટી, ૧૯. બોસ્ટન, અમેરિકા, ૨૦. શિકાગો, અમેરિકા ૨૧. એન'જામેના- ચાડ, ૨૨. વોશિંગ્ટન, ડી.સી., યુએસએ, ૨૩. શાંઘાઈ, ચીન, ૨૪. વિયેના, ઓસ્ટ્રિયા, ૨૫. બેઇજિંગ, ચીન, ૨૬. કોનાક્રી, ગિની, ૨૭. એટલાન્ટા, યુએસએ, ૨૮. સિએટલ, યુએસએ, ૨૯. પેરિસ, ફ્રાન્સ, ૩૦. એમ્સ્ટર્ડમ, નેધરલેન્ડ
હોંગકોંગમાં ભાડાનું ઘરઃ હોંગકોંગમાં રહેવાની સૌથી મોંઘી વસ્તુ ઘરનું ભાડું છે. એક બેડરૂમના એપાર્ટમેન્ટ માટે લગભગ રૂ. ૨.૨૫ થી રૂ. ૪.૪ લાખ ચૂકવવા પડે છે. જો તમે એક બેડરૂમનું એપાર્ટમેન્ટ શોધવા માટે શહેરની બહાર જાઓ છો, તો તમારે લગભગ રૂ. ૧,૧૫,૦૦૦ થી રૂ. ૨,૭૫,૦૦૦ ચૂકવવા પડશે. જો તમે શહેરની મધ્યમાં ૩ બેડરૂમનું એપાર્ટમેન્ટ શોધો છો, તો ધારો કે તમારે દર મહિને ઓછામાં ઓછા રૂા. ૫,૦૦,૦૦૦ ચૂકવવા પડશે. જો તમે વધુ સારું ઘર શોધો છો, તો તમારે દર મહિને લગભગ ૯ લાખ રૂપિયા ચૂકવવા પડશે. શહેરની બહાર ૩ બેડરૂમના એપાર્ટમેન્ટની કિંમત આશરે રૂા. ૩,૦૦,૦૦૦ થી રૂા.૬,૦૦,૦૦૦ થઈ શકે છે.
હવે જો તમે ઘર ખરીદશો તો તમને વીજળી અને પાણી જેવી સુવિધાઓની પણ જરૂર પડશે. આવી સુવિધાઓ માટે અલગથી ખર્ચ રૂ. ૨૦,૦૦૦ થી રૂ. ૨૮,૦૦૦ સુધીનો હશે. ઇન્ટરનેટ માટે તમારે દર મહિને ૨,૨૦૦ થી ૫,૫૦૦ રૂપિયા ચૂકવવા પડશે.
વાળ કાપવા માટે ૫૦૦૦ રૂપિયા સુધીનો ખર્ચઃ હવે જયારે કોઈ હોંગકોંગમાં સ્થાયી થશે તો તેણે પણ વાળ કપાવવા પડશે. એક વાળ કાપવા માટે તમારે રૂા. ૧,૭૦૦ થી રૂા. ૫,૨૦૦ સુધીનો ખર્ચ સહન કરવો પડી શકે છે. જો તમને થોડી શરદી અને ઉધરસ છે, તો તેના માટે પણ તમારે રૂા. ૬૦૦ થી રૂા. ૧,૨૦૦ સુધીનો ખર્ચ ઉઠાવવો પડશે. આવું ત્યારે થાય છે જયારે તમે ડોક્ટર પાસે જવાને બદલે મેડિકલ સ્ટોરમાંથી સામાન્ય દવાઓ ખરીદો છો.
માત્ર હેલ્પર ૫૦,૦૦૦ રૂપિયા લે છેઃ જો તમને ઘરના કામ માટે ફુલ ટાઈમ હેલ્પરની જરૂર હોય, તો તમારે દર મહિને અંદાજે રૂા.૫૦,૦૦૦ ચૂકવવા પડશે. કારણ કે ત્યાંની સરકાર દ્વારા મદદગારો માટે આ લઘુત્તમ પગાર નક્કી કરવામાં આવ્યો છે. જો તમને પાર્ટ-ટાઇમ હેલ્પર જોઈએ છે, તો તમારે કલાકદીઠ ચૂકવણી કરવી પડશે. ૧ કલાક માટે તમારે રૂા.૭૦૦ થી રૂા.૧,૫૦૦ ચૂકવવા પડશે.
(9:57 AM IST)









છેલ્લા 8 દિવસમાં સૌથી લોકપ્રિય 
