<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 19th June 2024

બેકગ્રાઉન્ડ ચેક, ડ્રોન એડવાઈઝરી જારી :શ્રીનગરમાં યોગ દિવસની અભૂતપૂર્વ તૈયારીઓ :પીએમ મોદી દાલ તળાવના કિનારે કરશે યોગ

પીએમ મોદી 21 જૂને આંતરરાષ્ટ્રીય યોગ દિવસ નિમિત્તે શ્રીનગરમાં દાલ તળાવના કિનારે યોગ કરશે. પીએમની મુલાકાતને ધ્યાનમાં રાખીને સુરક્ષા વ્યવસ્થા સઘન : ડ્રોન ઉડાડવા પર પ્રતિબંધ :SPGની ટીમ શ્રીનગર પહોંચી:કેન્દ્રીય સુરક્ષા દળના જવાનોને પણ તૈનાત

શ્રીનગર:વડાપ્રધાન મોદી શુક્રવારે આંતરરાષ્ટ્રીય યોગ દિવસ નિમિત્તે શ્રીનગરમાં દાલ તળાવના કિનારે યોગ કરશે. આ અંગેની તૈયારીઓ અંતિમ તબક્કામાં છે. અત્યંત ચુસ્ત સુરક્ષા વ્યવસ્થા ગોઠવવામાં આવી છે. 

    પીએમ  મોદીના પ્રવાસ દરમિયાન શ્રીનગરમાં બહુસ્તરીય સુરક્ષા વ્યવસ્થા કરવામાં આવશે. જમ્મુ-કાશ્મીર પોલીસે મંગળવારે શ્રીનગરને 'અસ્થાયી રેડ ઝોન' તરીકે જાહેર કર્યું છે. એડવાઈઝરી જારી કરીને શહેરમાં ડ્રોન ઉડાડવા પર પ્રતિબંધ મુકવામાં આવ્યો છે.

  વડાપ્રધાનની સુરક્ષા માટે SPGની ટીમ શ્રીનગર પહોંચી ગઈ છે. કેન્દ્રીય સુરક્ષા દળના જવાનોને પણ તૈનાત કરવામાં આવ્યા છે

  . શુક્રવારે સવારે દાલ તળાવના કિનારે શેર-એ-કાશ્મીર ઇન્ટરનેશનલ કોન્ફરન્સ સેન્ટર (SKICC) ખાતે 10મો આંતરરાષ્ટ્રીય યોગ દિવસ ઉજવવામાં આવશે. પીએમ મોદી ગુરુવારે સાંજે શ્રીનગર પહોંચશે. આ કાર્યક્રમમાં મોટી સંખ્યામાં યોગ પ્રેમીઓ અને ખેલૈયાઓ ભાગ લે તેવી અપેક્ષા છે.

  સૂત્રો પાસેથી મળેલી માહિતી મુજબ શ્રીનગરના દાલ તળાવના કિનારે એક સપ્તાહથી યોગ દિવસની તૈયારીઓ કરવામાં આવી રહી છે. SKICC ખાતે સફાઈ અને બ્યુટીફિકેશન કરવામાં આવ્યું છે. અગાઉ પીએમના આગમનની માહિતી ગુપ્ત રાખવામાં આવી હતી. જમ્મુ અને કાશ્મીર પોલીસના ક્રિમિનલ ઇન્વેસ્ટિગેશન ડિપાર્ટમેન્ટ (CID) દ્વારા ઇવેન્ટમાં હાજર રહેલા અધિકારીઓ, ફરજ પરના લોકો અને ભાગ લેનારા ખેલાડીઓની પૃષ્ઠભૂમિની તપાસ કરવામાં આવી છે

  મોદી આ વર્ષે બીજી વખત શ્રીનગર જવાના છે. તેમણે ફેબ્રુઆરીમાં શ્રીનગરની મુલાકાત લીધી હતી. પીએમએ રેલીને સંબોધી હતી. ગયા વર્ષે પીએમ મોદીએ ન્યૂયોર્કમાં સંયુક્ત રાષ્ટ્રના મુખ્યાલયમાં આંતરરાષ્ટ્રીય યોગ દિવસની ઉજવણી કરી હતી.

   સપ્ટેમ્બર 2014 માં, ભારતના વડા પ્રધાન  મોદીએ સંયુક્ત રાષ્ટ્ર મહાસભામાં તેમના સંબોધન દરમિયાન આંતરરાષ્ટ્રીય યોગ દિવસની ઉજવણીનો પ્રસ્તાવ મૂક્યો હતો. તેમણે સૂચન કર્યું હતું કે 21 જૂનને આંતરરાષ્ટ્રીય યોગ દિવસ જાહેર કરવો જોઈએ. તેમના પ્રસ્તાવને યુએનના સભ્ય દેશો તરફથી જબરજસ્ત સમર્થન મળ્યું. આ કારણે ડિસેમ્બર 2014માં સંયુક્ત રાષ્ટ્ર મહાસભા દ્વારા 21 જૂનને આંતરરાષ્ટ્રીય યોગ દિવસ તરીકે અપનાવવામાં આવ્યો હતો.

(10:51 AM IST)